Tydbom

By Francois Meyer

Francois Meyer se vyfde digbundel, tydbom, sien die lig met krag, emosie en insig en toon dit die duidelike groei wat hy as digter/skrywer ondergaan het. 'n Pad word gestap deur liefde soos dit in al die verskillende fasette vasgevang word. Met die intreevers – ''blomme is sensitief my lief/– bomme ook –/een letter te kort/laat liefde stol'', besef die leser sommer dadelik dat hierdie bundel totaal in 'n ander kategorie val.

Deurlopend is daar soveel deernis, emosie en sensitiwiteit en is die gedigte met keurige woordkeuse en taal tot beeld geruk. Van die gedigte vertel van sekere dele in verre stede wat hy besoek het en beeld hy die liefde uit 'n pikturale oogpunt aan.

Liefde word soms tot op die been gesny en gekloof deur sy unieke beeldspraak en woordkeuses. Familie-, kerk-, lewensmaat-, hartseerliefde en die opwinding van net om lief te hê word vasgevang en word dit ingedrink tot en met die laaste gedig in hierdie bundel. Dus is dit geen wonder dat die gedig liefde is soos die winter, wat die top vyftien van LitNet se Liefde is ...-kompetisie behaal het, ook in die bundel opgeneem is nie.

Francois se onkonvensionele styl word weereens duidelik getoon en verstom hy met sy diepte. Liefde word in tydbom in sy volle naaktheid uitgebeeld.

• Language: Afrikaans
• Publisher: Francois Meyer
• Release date: Jun 21, 2019
• ISBN: 9780639900735

Francois Meyer

Francois is op 21 Januarie 1994 in Bloemfontein gebore. Hy was ‘n leerling aan die Hoërskool Fichardtpark en sy digkuns is reeds op skool geprys. Hy debuteer met Tempora Animus op 19-jarige ouderdom in 2013. Vandaar het hy Onder die Dekmantel(2015), Digtershart (2016) en Pendulum (2017) as digbundels vrygestel. Francois is ‘n kampvegter vir lupus en sy prosaboek, Die wêreld deur haar oë, was vir twee weke die topverkoper op Kobo Books in vyf kategorieë. Hierdie publikasie is ook in Engels vrygestel. In 2017 word hy as Ink Skryf in Afrikaans se rubriekskrywer van die jaar aangewys en verwerf ook ‘n tweede plek in die kategorie Digter van die Jaar. In 2018 ontvang hy ‘n Radio Rosestad Roostoekenning vir sy bydrae tot die Afrikanerkultuur.

Book preview

blomme is sensitief my lief

– bomme ook –

een letter te kort

laat liefde stol

lewenslyn van 'n digter

gedagtes giet oor gisterverdriet

storms stol my verse vol

en bly blink in die ink

wat in strofes weerkaats

soms word lief en leed weggesteek

in die DNS-koorde

van 'n stil(woord)geboorte

die druppels spreek

van 'n duisendmaal se vergeef

om oor en oor my wese

in ars poetica te kerf

maar ék

ek bly net 'n ballade

op 'n imperfekte lewenslyn

in lettergrepe g e t r e k

laat my ontwaak

uit die hongersnood

en wees weer die reën

op my dorre tong

fynbos

wanneer droë woorde

oor die moederbaai waai

en my taal in die sug

van die hopeloses

die voorspellers

die sondaars

en storievertellers

sy ewige Weskus-rus vind

word jy blind vir die smaak

van chenin blanc waarin ek

soos 'n anker sink

ek wou die wolke pars

en nuwe wyn oor die landskap

se hulpkreet laat uitbars

ek wou

ek wou

jou vir oulaas laat onthou:

jy is die reën in my Kaap-gedagtes

en ek

ek bly maar net die fynbos –

die fynbos in jou bewolkte oë

sillabeskrif

prenatale vokale veg

om hul inkgeboortereg

uit 'n tikmasjien se moederskoot

maar dis nie hoe woorde

asem van jou beroof nie

laat loop die linne

(van jou oë my beminde)

soos heilige water

laat ek die letters

oor jou sagte strook naspoor

en in fluistersillabes van die nag

nóg aalmoese van jou vra

dan sal ek soos

'n wedergebore wandelaar

jou papirus lof