Op met die af-roltrap
MELISSA voel hoe iemand haar dringend probeer wakker skud. Buite gil ’n meisie histeries. Die son skyn helder deur die tentflap na binne. Te helder, dink sy toe sy stadig orent beur en bewus raak van ’n verblindende hoofpyn.
Met haar oë op skrefies probeer sy haarself oriënteer. Jerry sit op sy hurke voor haar, sy hemp oopgeknoop. Sy linkeroog is toegeswel en daar is ’n bloedsmeer oor sy wang. Hy praat gedemp: “Ons gaan moet waai, Mel. Soos in nóú, girl. Kry jou stuff en kom. Frank wag vir ons. Hy sê dit lyk of ou Beast ge-overdose het. Ons kry hom nie by nie. As die paramedics kom, gaan hulle onnodige vrae vra. Kan jy iets onthou van gisteraand?”
Melissa skud haar kop stadig en voel hoe die naarheid in haar keel opstoot. Hoendervleis slaan oor haar hele lyf
