Die lesse wat olifante ons leer
’n Droë suidooster vorm sy wit wolk op Tafelberg waar dit in vlae oor die rand tuimel, af stad toe, en dan in slierte van watte oplos en verdwyn.
Dis vreemd genoeg ’n windstil aand.
Subteks, die bekende boekwinkel aan die voet van die berg, is vanaand die ene opwinding en afwagting. Hoewel die lys van gewilde skrywers wat al hier opgetree het lank en indrukwekkend is, is die aankondiging dat C.K. Dreyer Verlies hier gaan bekend stel met ongekende entoesiasme begroet. Hierdie literêre held se boeke is alomgeliefd, maar die skrywer se persona en hoogs private lewe is al beskryf as ’n enigma en ’n raaisel.
Wie ís die geheimsinnige man wat so helder kan skryf ?
Teen sesuur is elke stoel in die oorvol boekwinkel ingeneem en agter die laaste ry stoele staan die laatkommers skouer teen skouer. Baie het reeds gekoop, reg om deur die outeur geteken te word.
