Blessings van bo

EINDELIK is dit weer lente. Héérlike lente! Die vaal ou winterwêreld is ná die eerste lentereëns omgetower in ’n bont sprokieswêreld van kleurvolle bloeisels en lemmetjiegroen blare. Nuwe lewe knipoog en wink, en daar is ’n lentehuppel in Anke se stap.

Selfs die voorstad Linden, hier in die hartjie van grys ou Johannesburg, is ’n karnaval van kleur in die lente, dink sy terwyl sy 4de Laan oorsteek. Die lentesonnetjie bak op haar kaal skouers en die soet geur van jasmyn en pronk-ertjies laat haar onwillekeurig terugverlang na haar kinderjare en lentedagvierings op skool. Waar is die tyd heen?

Anke onthou hoe sy voortdurend as kind deur haar ouers vermaan is dat ’n mens geken word aan jou vriende en daarom moet sorg dat jy “reg kies”. So het sy dan ook dwarsdeur haar lewe vriendinne ontmoet, een vir een