Algebra van nood

By Johann de Lange

Hierdie bekende digter se eerste bundel in byna 13 jaar is ’n belangwekkende gebeurtenis wat menige poësieliefhebber sal laat regop sit. Baie van die gedigte is oor kenmerkende De Lange-temas en onderwerpe (die homoërotiek, dwelmgebruik, die skryfkuns) en die deurlopende tematiek van nood word met verrassende skakerings oorgedra, ’n boeiende kaleidoskoop van fasette van die menslike nood, angs en weemoed. Die gedigte is poëties onopgesmuk, met ’n deurleefde deernis met die mens en sy emosionele wêreld. Die reeks “in memoriam”-gedigte vorm ’n hoogtepunt binne hierdie konteks. Bekroon met die Hertzogprys vir poësie in 2011.

• Language: Afrikaans
• Publisher: Human & Rousseau
• Release date: Mar 1, 2013
• ISBN: 9780798154192

Johann de Lange

Johann de Lange is op 22 Desember 1959 in Pretoria gebore. Sy debuutbundel, Akwarelle van die dors (1982), is met die Ingrid Jonker-prys bekroon. Sy vierde bundel, Wordende naak, word in 1990 met die Rapportprys vir Poësie bekroon. Die algebra van nood, wat in 2009 verskyn het, is in 2011 met die Hertzogprys bekroon.

Book preview

Die algebra van nood

Johann de Lange

Human & Rousseau

Die uitleg van gedigte en afbeeldings in hierdie digitale uitgawe verskil moontlik van dié van die gedrukte uitgawe, afhangende van die instellings op u leestoestel. Die uitleg vertoon optimaal indien die standaardinstelling op u leestoestel gebruik word. Lesers kan egter eksperimenteer met die instellings op hul leestoestel vir verskillende perspektiewe op die gedigte.

vir Joan

These fragments I have shored against my ruins

T.S. Eliot

I. Hiermaals

The trees are coming into leaf

Like something almost being said;

The recent buds relax and spread,

Their greenness is a kind of grief.

Philip Larkin

Inval van die lente

Die opmars is steels:

van kloot na stingel na loot

word die winteruitvaart pril ontwy.

Drie moerbeie

salueer adret die nuwe seisoen

fier in hul strak uniform,

deur elke ogie bot ’n groen knoop.

Duskant die palissade hef

’n falanks kannas

hulle bloedrooi

swaarde in gelid,

met hoër op trompettertjies

se bont taptoe. Die tuinhek

swaai kopergroen op ’n speelpark

oop met nóg verder weg bivak

op bivak tussen heuwels

waar ’n ruie horde voetsoldate

met salvo’s vlaag op vlaag ontplooi.

Voorstedelike aubade

Die lyster skud die nanag uit sy vere.

In sy oog van obsidiaan

kaats die dwaallig

van ’n suikerkan-son.

Laventelbos & katjiepiering

wierook op die ligte wind,

& lok die onledige bye,

daardie stropers met geel kuite.

In die gonsende korf

van kniediepvoordag dans & tol

sterre sonder tal

die taai logaritme los.

Groen

Woord waarin ek sluimer

omgroen my. Die treurmoerbei

is ’n bruilofsfees

van groen strikdasse.

Die slak slaap nog dig

teen die skurwe bas

& onder die struike

tarentaal

skaduwees veerlig.

Kunsklas met moerbeiboom

Die moerbeiboom staan

winterstrak gemondriaan,

afgeteken teen die grou ets-

plaat van die lug: ’n winterkou

waarin wit windstiltes hou.

Kom somer sal die vink & spreeu

met oggendsang weer purper note

kwastig van die lote hang.

Die rooikrans-pit

Die rooikrans-pit

het ’n rooi lys

om die git om

kraaloog die blik

te vang van die diederik.

Die maraboe

vir Ina Rousseau

Die maraboe buig