Ek moet Praat

By Frances Frans

Frances “MOET PRAAT” en het dinge wat sy van haar hart af moet kry.
In hierdie bundel kort sketse praat sy met die vrou wat al die bitter beker tot op die bodem geledig het. Die een wat voel dat sy nie meer kan voortgaan nie.
Daar is hoop vrou! God weet van jou en Hy gee om!!!

Frances weet waarvan sy PRAAT as sy skryf oor die volgende:
Die ander vrou.
Die gestremde kind.
Die alkoholis.
Meneer se skelmpie.
Stiefkinders.

• Language: Afrikaans
• Publisher: Kameeldoring Boeke
• Release date: Nov 20, 2016
• ISBN: 9781370162390

Frances Frans

Frances N. Frans, is ‘n gekwalifiseerde onderwyseres en weduwee. Sy is woonagtig te Pacaltsdorp saam met haar enigste kind, Byron.

Book preview

Frances Frans

Ek moet Praat

Uitgegee deur Kameeldoring Boeke

Kopiereg © 2016 Frances Frans

Navigasie

Spesiale gebed

My liggaam

Op die rak

Die gestremde kind

My stiefkinders

Kampusliefde

My vrese

Misdaad

Ek, die alkoholis

Die lotery

Terminasie

Die leë moederskoot

Tienerswangerskap

My talente

Die weduwee

Die bejaarde vrou

Meneer se skelmpie

Egskeiding

Die Ander vrou

My man, die psigopaat

My land

Skoonma

My kind,die dwelmverslaafde

In die siekekamer

My pa,die molesteerder

Ongetroud by Ma

Dood van `n eggenoot

Selfmoord van `n kind

Naskrif

VOORWOORD

In die lewe van elke vrou kry sy te doen met hartseer, vertwyfeling en frustrasies. Dit voel vir haar of sy alleen op die aarde is en dat niemand haar pyn en lyding verstaan nie. Dis tye soos hierdie dat sy genoodsaak word om op haar knieë te gaan en tot God te bid wat haar enigste Ware Helper is.

Die boek handel dus oor die diepste gevoelens wat `n vrou ervaar. Aan die einde van van elke gebeurtenis / beskrywing is `n gebed wat van toepassing is op die spesifieke situasie.

SPESIALE GEBED

Almagtige God en Hemelse Vader, Skepper van hemel en aarde, aan U kom toe al die lof en die eer. Ek wil in hierdie oggenduur myself asook al die vrouens regoor ons land aan U opdra. Ek wil by U kom pleit om ons in die holte van u hand te hou. Gee die Engel van die Here opdrag om `n laer om ons op te slaan en te beskerm teen alle onheil. U het ons, die moeders, gemaak. U het ons uitgekies om vrugbaar te word en kinders in die wêreld te bring. Dankie vir die wonderlike voorreg wat ons kon smaak om moeders te kon hê wat ons na die beste van hul vermoëns grootgemaak het. Moeders wat biddend hul kinders aan U opgedra het.

Vandag wil ons hulde bring aan hulle wat nie meer daar is nie. Moeders wie se liefde geen grense geken het nie. Moeders wat selfs hul liggame oor sou gee om verbrand te word ter wille van hul kinders.

Dankie Here, dat U ons spesiaal toegerus het vir ons grootse taak op aarde. Vir wysheid en leiding, Skepperheer. Ek wil ook elke nuwe moeder aan U opdra. Seën hulle Here en wees vir hulle ʼn God van naby. Gee dat hulle nooit moeg sal word om in u voetspore te volg nie. Dat hulle U gedurigdeur sal voorhou as die ideale leermeester. Ons lewe in `n bose wêreld. `n Wêreld wat dreig om alles af te breek wat deur die eeue heen so sorgvuldig deur ons moeders opgebou is. Gee vir ons die nodige krag sodat ons `n waardige voorbeeld vir ons kinders kan wees. Skenk vir ons die genade om die tyd uit te koop en die beste gebruik te maak van elke geleentheid. Ons vra dit in alle nederigheid en danksegging in die naam van Jesus Christus. AMEN

Terug na inhoud

MY LIGGAAM

Ek kan myself nie meer in die oë kyk nie. Die spieël, wat veronderstel is om elke vrou se beste vriend te wees, het nou my grootste vyand geword. Ek is bang vir wat ek daar sal sien. My refleksie in die blink gedoente het iets geword wat my gedurigdeur agtervolg. Selfs in my drome.

Ek is vet! Sommige mense noem dit oorgewig. Andere praat ewe eufemisties van die groot vrou. Dis een en dieselfde ding. Maak nie saak hoe jy dit probeer verbloem nie. Jy het `n etiket om jou nek gekry. As mense na jou kyk sien hulle iemand wat haarself te buite gaan aan kos en lekkernye. Jy kan tog nie elke tweede persoon wat jou aanstaar voorkeer en sê dat jy níé so wil wees nie.

Dis geen plesier om winkels toe te gaan nie! Klere koop word `n nagmerrie. Die assistent probeer haar bes om ongeërg te lyk as jy instap. Jy weet egter wat in haar gedagtes aangaan. Eintlik is die stomme mens verleë. Sy weet nie hoe sy moet optree nie en glimlag blink. Jy kan sien hoe sy haar inspan om nie na jou volrondheid te kyk nie.

As jy uiteindelik iets gekry het wat lyk asof dit jou liggaam kan binnehou, is die aanpashokkie die volgende kopseer. Jy wonder hoekom dit so piepklein moet wees. Wéét die mense nie dat hierdie ou ondermaanse nie net deur kraaie bewoon word nie?

Mans is ook een van die dinge wat jou laat grens soos `n hond in die maanlig. Waarmee assosieer hulle nou eintlik `n vet vrou? Die meeste van die tyd ignoreer hulle jou. Omdat jy jou lewens-sorge wil verberg agter `n breë glimlag, dink sommige jy is voor op die wa. Jy kan behoorlik sien hoe glim daardie oë wanneer hulle na jou kyk. As hulle dan wel met jou bevriend raak, is dit nie honderd jaar nie of hulle begin allerhande truuks uithaal. Konfronteer jy hulle oor hul absolute gebrek aan takt, is hulle heel verbaas .

Ek weet nie hoe sommige mans se koppe werk nie. Miskien dink hulle `n vet vrou moet eintlik bly wees as hulle in jou belangstel, want jy het mos nie `n verskeidenheid om uit te kies nie, sien? Dis om van siek te word!

Nou kom die werksaansoek! …As jy uiteindelik van aangesig tot aangesig kom met die ou wat die onderhoud voer, kan jy met `n stok aanvoel hy probeer die storie so gou moontlik agter die rug kry. Met `n haastige; Ons sal u bel, dame, word jy hoflik by die deur afgesien. Totsiens, job!

Indien jy , wonder bo wonder, met die hulp van die geluksgodin natuurlik, die werk kry is dit verbasend hoe jou nuwe kollegas jou benader. Hoekom bedel hulle van dag een af by jou iets lekkers om te eet? Waarom word dit jóú taak om die ketel aan te skakel en dus…onvermydelik…die amptelike teemaker te word?

Die mens wat jou regtig teen die mure wil laat uitklim is die tydige en ontydige verkoopsagent van enige iets denkbaar. Diegene wat lofliedere sing oor die beste dieëtplan op die mark, span die kroon. Jy wil tog nie ongeskik wees nie. Jy het alles probeer. Jy het jouself al uitgehonger, al die pille op die mark gedrink en jou flou geoefen in die gyms van die land. Alles tevergeefs. As jy wel daarin slaag om één ou kilogrampie af te skud, verdriedubbel dit sommer in die eerste maand. Die vervaardigers van hierdie produkte het blykbaar ook nie voorsiening gemaak vir die siel wat koning kraai waar dit by newe-effekte kom nie. Ek weet nie…daar moet iets verkeerd wees met my samestelling.

Ek het besluit om vrede te maak met my liggaam. Dis al wat vir my oorbly. Na soveel mislukte dieëtprogramme het ek besluit om handdoek in te gooi. Waarom sal ek myself verder bespotlik maak en my bankbalans ook boonop met rasse skrede laat krimp?

Ek sal my maar moet berus by die feit dat diegene met minder liggaamsomset altyd my uitkies as biegmoeder. Blykbaar nooi my volronde boesem my skraler susters in nood uit om hul hartsversugtinge