Hanteer diabetes en verwante gesondheidskwessies

By Dr Arien van der Merwe

Na raming het meer as 3,5 miljoen Suid-Afrikaners diabetes. Wêreldwyd het ongeveer 150 miljoen mense metaboliese sindroom (wat diabetes insluit) en dit dikwels sonder dat hulle dit eers weet ... Suid-Afrikaanse mediese dokter, skrywer en kenner op die gebied van holisties geïntegreerde medisyne, dr Arien van der Merwe, verduidelik in hierdie tydige en maklik leesbare boek wat presies diabetes is, die simptome, en die verskillende soorte – tipe 1, 2 en 3, wat diabetes veroorsaak, van fisiologie tot emosies, wat pre-diabetes en insulienweerstandigheid is, hoe diabetes en metaboliese sindroom verwant is, hoe diabetes verband hou met hartsiektes, Alzheimers en depressie en die verskillende soorte medikasie. Sy verskaf praktiese oplossings oor hoe diabetes en verwante kwale bestuur kan word, deur onder meer leefstylaanpassings – van slaap tot ontspanning, die regte oefening, wat interval- en weerstandsoefeninge insluit, gesonde eetgewoontes en vas met tussenposes, die hanteer en bestuur van stres en die aanspreek van onderliggende emosionele aspekte. Dr Van der Merwe verduidelik die verband tussen jou liggaam, emosies en siel, en gee raad oor voedselaanvullers en kruiemiddels. Boonop bring dié boek ’n boodskap van hoop: Diegene met diabetes en metaboliese sindroom se bloedsuikervlakke en verwante simptome kán doeltreffend bestuur word, soms selfs omgekeer word, wat dit moontlik maak om ’n normale, aktiewe en lang lewe te lei.

• Language: Afrikaans
• Publisher: Human & Rousseau
• Release date: Sep 10, 2015
• ISBN: 9780798169394

Dr Arien van der Merwe

Dr Arien van der Merwe – MBChB (Pretoria), FRSPH (London), MISMA (UK), NHA (SA) – is a medical doctor, specialising in workplace wellness, body-mind and holistic integrative medicine, stress management and longevity. Arien is an internationally renowned holistic health expert and bestselling author, a well-known and experienced public speaker and trainer, and an internationally published author of 22 books and training manuals on health and wellness. She has been a medical specialist in workplace health and wellbeing since 1998. She facilitates courses, support groups and seminars on diabetes and related health challenges, such as metabolic syndrome and insulin resistance. Dr Arien recently developed the Timeless DNA™ Program to entertain, enlighten and educate people about how to live for 120 healthy, happy years (our natural lifespan!), embodying the concept of beauty within, beauty without and beauty of being. Dr Arien is registered by the Natural Healers Association (NHA) as Trainer and Ethno-medicine Practitioner in the field of Traditional Health Care, is a Fellow of the Royal Society of Public Health (FRSPH, London) and Member of the International Stress Management Association (MISMA), UK branch. Dr Arien writes, and consults regularly, for many magazines and newspapers in South Africa, and appears on countless national radio and TV shows as a guest. She is the director of Health Stress Management Gauteng (Pty) (Ltd) and owner of the Healthy Living Space, based in Pretoria, and online (www.DrArien.co.za).

Book preview

Hanteer diabetes

en verwante gesondheidskwessies

Dr Arien van der Merwe

Human & Rousseau

Die uitleg in hierdie digitale uitgawe van Hanteer diabetes en verwante gesondheidskwessies mag verskil van dié van die gedrukte uitgawe, afhangende van die instellings op u leestoestel. Die uitleg vertoon optimaal indien die standaardinstelling op u leestoestel gebruik word. Lesers kan egter eksperimenteer met die instellings vir verskillende perspektiewe.

Inleiding

In reaksie op baie lesers se versoek vir ’n boek oor diabetes, het NB Uitgewers my gevra om so ’n boek te skryf. Hierdie onderwerp lê my na aan die hart. As mediese dokter en skrywer wat sedert 1995 in natuurlike geïntegreerde medisyne spesialiseer, is dit deel van my genesingsfilosofie om altyd na die dieper oorsaak te soek, daardie onderliggende en verskuilde, vasgekeerde emosies onderliggend aan alle ‘onwel-wees’ en siekte, en dit te behandel, tesame met die nodige leefstylaanpassings en natuurlike geneesmiddels.

Dit verseker ’n geïntegreerde benadering tot die bestuur van alle chroniese leefstylsiektes, waarvan diabetes ’n belangrike een is, veral wanneer dit gekombineer word met sy meelopers – hartsiekte, depressie en metaboliese sindroom (dikwels Sindroom X genoem).

Die steeds groeiende aantal mense wat met diabetes – een van die grootste hedendaagse chroniese siektes, oftewel gesondheidsuitdagings vanuit die welweesperspektief – gediagnoseer word, is ongekend. Dit dui duidelik op die dringende en noodsaaklike behoefte aan ’n ander perspektief, ’n geïntegreerde benadering tot die bestuur daarvan. Die statistieke is verstommend! Die Internasionale Diabetesfederasie (www.idf.org) skat dat die huidige wêreldbevolking van ongeveer 382 miljoen mense met diabetes oor die volgende 20 jaar tot meer as 590 miljoen sal styg. Dit is een uit elke 10 volwassenes! Daar word geraam dat nagenoeg drie en ’n half miljoen mense in Suid-Afrika diabetes het, met nagenoeg ’n verdere 50 persent wat nie gediagnoseer is nie.

In 2012 het ek weens my eie gewigsuitdaging, asook my belangstelling in insulienweerstandigheid (dikwels ’n voorloper van diabetes) en natuurlike medisyne as oplossing, die Weight Control Clinic by dr. WGG Gauché (in 1974 gestig) oorgeneem. Dit het uit praktiese ervaring duidelik geword dat die meeste pasiënte wat meer as 8 kg liggaamsvet moet verloor óf insulienweerstandig is en hoë vastende insulien het, en dikwels ook hoë bloedglukosevlakke, óf reeds tipe 2-diabetes het. Dit moes dus onder die vergrootglas kom. Ons het verstommende sukses behaal met ’n groep mense (dit is dié met diabetes), wat bekend was daarvoor dat hulle baie gesukkel het om gewig (veral liggaamsvetgewig) te verloor.

Hierdie boek is daarom ’n sameloop van drie jaar praktiese ervaring in die hantering van diabetes en 20 jaar ervaring van leer, skryf en onderrig daaroor – binne die konteks van ’n natuurlike, geïntegreerde benadering, insluitend goed nagevorsde natuurlike geneesmiddels en omvattende leefstylriglyne. Die doel van my benadering is om aan elkeen met hierdie algemene gesondheidsuitdaging hoop en toegang tot die nodige inligting en hulpmiddels te gee. So kan ’n mens selfverantwoordelikheid vir die reis na genesing aanvaar.

Die boek gebruik ’n liggaam-siel-benadering om sin te maak van diabetes as spesifieke voorbeeld van ’n chroniese leefstylsiekte. Dit gebruik die metafoor van ’n alchemiese reis deur die liggaam, waar gebruiklike denkpatrone en vasgekeerde emosies teëgekom en gedrag verander word, en uiteindelik lei tot die fisieke uitwerking van genesing diep binne-in selgeheues, deur DNS- (deur middel van epigenetiese en metagenetiese herstrukturering) en breinherprogrammeringsmiddels en -tegnieke. Dit verskaf ’n geïntegreerde benadering op ’n nuwe pad terug na gesondheid. Talle natuurlike genesingsopsies, soos nutriseutiese en kruiemiddels (gawes van die natuur), kleure, klank, lig, aromaterapie-olies en spesifieke ontspanningsoefeninge, word bespreek en verduidelik. Praktiese tegnieke word ook verskaf om selfverantwoordelikheid te kan aanvaar vir eie gesondheid en welwees.

Miljoene mense kry daagliks wêreldwyd die tyding van ’n ernstige, chroniese en potensieel lewensbedreigende leefstylsiekte, of die risiko om een te ontwikkel (soos diabetes) tydens ’n mediese ondersoek. Sodra die diagnose gemaak is, wil ons meer inligting hê om beheer terug te neem oor ons eie gesondheid en onsself van ‘n ‘arme ek’-beeld te bevry. Ons weet intuïtief dat dit nie genoeg is om bloot die simptome te behandel nie. Daar moet ’n dieper betekenis en doel aan elke gesondheidsuitdaging wees, of dit nou akuut of chronies is. ‘Wat kan ek doen om my gesondheid te verbeter of te bestuur?’ is seker die vraag wat elke gesondheidsorgpraktisyn die meeste hoor.

Die doel van hierdie boek is om vir lesers praktiese antwoorde en inligting te gee waarmee hulle elke dag kan werk. Werk gerus deur hierdie boek, besin en bepeins die kwessies, praat met ander en skryf in jou dagboek neer. Dan sal jy weet hoe om jou eie gesondheidsuitdaging(s) te benader, te voorkom en te bestuur met behulp van talle geïntegreerde genesingspraktyke wat jy elke dag kan inspan. Selfs vir dié sonder diabetes as gesondheidsuitdaging sal die genesing, natuurlike geneesmiddels, voedingsraad, oplos van emosionele kwessies en meditasiepraktyke help om liggaam en siel in harmonie te bring in ’n dans van balans en heelheid.

Die boek volg die middeweg as brug tussen linker- en regterbrein – tussen konserwatief en liberaal; enersyds suiwer analities, rasioneel, wetenskaplike en fisiese denke, en andersyds emosionele, kreatiewe, spirituele en simboliese regterbreindenke. Dit streef om die twee te integreer. Die suiwer linkerbreindenkers sal baie stof tot nadenke en riglyne vir eie genesing kry, en boonop hulle insig verbreed om na die wêreld en hulleself anders te kyk. Die regter- en heelbreindenkers sal terselfdertyd ook baie vind wat hulle belangstelling prikkel, en daarby hulpmiddels vir optimale gesondheid en welwees.

Die reis na genesing is diep en misterieus. Dit behels dat ons ou denk- en geloofspatrone, leefstyl en gedrag verander, asook diep verandering teweegbring in die selomgewing (innerlike milieu van elke sel), wat dikwels in ons natuurlike omgewing weerspieël word.

Om die ego en onderbewuste (of onbewuste) denke met sy verskuilde saboteurs (vasgekeerde emosies) te temper, het jy ’n paar basiese bestanddele nodig: geduld, oefening en deursettingsvermoë. Voeg daarby ’n skeutjie gemoedelike buigsaamheid, tesame met gereelde tydperke van meditasie, nadenke, bepeinsing en gebed om die superbewuste denke en Goddelike Intelligensie in te nooi in die genesing van die liggaam-siel-eenheid. Meng dit nou met ’n groot porsie dapperheid, humor en dissipline – om aan te hou en deur te druk, selfs wanneer dit voel asof niks gebeur nie, of selfs aanvanklik erger word.

Ons het twee maniere van leef: Een is suiwer om te oorleef, die ander om sukses te behaal en te floreer in gesondheid, vreugde en geluk – ons natuurlike geboortereg. Die keuse is ons s’n om elke oomblik, elke dag van ons lewe te maak. Om bewus te word hiervan en doelbewus oomblik vir oomblik ons pad te kies, is ons belangrikste taak in hierdie lewe.

Ek nooi jou saam op hierdie alchemiese reis. Die reis is selfs belangriker as om enige toekomstige doel te bereik. Daar word gestreef om betekenis te vind in ‘onwel-wees’ en siekte, in ’n spiraalproses wat na binne begin draai en dan buitentoe uitdraai, om uiteindelik vryheid en vrylating van vasgekeerde emosies te bewerkstellig en ook te verstaan: Elkeen kan kies om self verantwoordelikheid te aanvaar wanneer die liggaam hom of haar deur fisieke simptome wys dat die balans versteur is.

Ons streef almal na ’n toestand van innerlike balans, om ons ware passie en doel as vreugdevolle mense uit te leef – vanuit die hart, in vrede, ontluikend in optimale gesondheid en welwees, terwyl ons ons lig na mense om ons versprei en so almal inspireer tot ’n vreugdevolle lewe. Genesing deur alchemie leer ons dat die innerlike soektog nie die eindresultaat of -produk is nie, maar eintlik die reis en innerlike genesingsproses self.

Soms moet ons onsself daaraan herinner dat die liggaam van nature gesond en wel wil wees!

Deel 1

HOOFSTUK 1

Agter die skerms – die diabetesprentjie

Feite oor diabetes en positiewe oplossings

STATISTIEKE

Volgens die Internasionale Diabetesfederasie (IDF) is daar na raming tans wêreldwyd 382 miljoen mense met diabetes. Dit sal na verwagting teen 2035 tot 592 miljoen toeneem. Daar is ’n geraamde 3,5 miljoen mense in Suid-Afrika met diabetes, van wie ongeveer 50 persent nog nie gediagnoseer is nie. Die meerderheid mense met diabetes is tussen 40 en 59 jaar oud. Diabetes wat swak bestuur word, kan tot ernstige komplikasies en selfs voortydige dood lei. Nagenoeg 85–95 persent van mense met diabetes het tipe 2-diabetes, wat gewoonlik in volwassenheid ontstaan.

Daar word dikwels na tipe 2-diabetes as ’n leefstylsiekte verwys, want risikofaktore sluit vetsug, swak dieet, hoë vlakke van ongesonde of negatiewe stres en fisieke onaktiwiteit in. Mense met ’n familiegeskiedenis van tipe 2-diabetes loop veral ’n groot risiko weens ’n genetiese vatbaarheid wat dui op swak skakels in die ensiemkettings wat verantwoordelik is vir die metabolisme van glukose en vervaardiging, afskeiding en werking van insulien. Mense wat ouer as 40 is, veral diegene wat oorgewig en onaktief is met ’n familiegeskiedenis van diabetes, behoort hulle vastende bloedsuikervlakke minstens een keer per jaar te laat nagaan. Dit kan met ’n eenvoudige vingerpriktoets in enige dokter se spreekkamer gedoen word.

KOMPLIKASIES

Komplikasies van diabetes sluit infeksies, kardiovaskulêre siekte (hartaanvalle, beroertes en perifere-slagaarsiekte), chroniese niersiektes, oogsiektes wat tot blindheid kan lei, en senuweeskade in. Senuweeskade wat deur diabetes veroorsaak word, kan ’n bron van pyn, prikkelende sensasie en verlies aan gevoel wees. Beserings word dikwels nie gevoel nie, en lei tot ernstige infeksies en vorming van sere, diabetiese voetsiekte (gangreen) en grootskaalse amputasies. Ander gevolge van senuweeskade sluit probleme met spysvertering, urinering en erektiele disfunksie (onvermoë om ’n ereksie te behou) in.

In byna alle hoë-inkomste-lande is diabetes die hoofoorsaak van kardiovaskulêre siekte, blindheid, nierversaking en amputasie van onderste ledemate. Namate die aantal mense met diabetes toeneem, neem die gevolge van hierdie ekonomiese las en vernietigende gesondheidsprobleme ook toe.

Mense met tipe 2-diabetes kan jare lank ongediagnoseer bly, heeltemal onbewus van die langtermynskade aan hulle liggaam weens die siekte.

Nou vir die goeie nuus!

Mense met diabetes se bloedsuikervlakke kan doeltreffend bestuur word wat ’n normale, aktiewe lewe met min, indien enige, beperkings moontlik maak. Daar is baie behandelings- en leefstylopsies om gesondheid te bevorder. Die handhawing van bloedglukosevlakke, bloeddruk en cholesterol of eerder lipiede (totale, HDL- en LDL-cholesterol, trigliseriede en homosisteïen) so na as moontlik aan normaal, kan help om komplikasies weens diabetes te vertraag en selfs te voorkom.

GLUKOSE IS DIE BRANDSTOF VIR SELFUNKSIE

Elke sel in die liggaam het brandstof nodig vir die optimale fisiologiese werking van alle biochemiese reaksies binne-in elkeen van ons 50 triljoen selle. Hierdie primêre brandstof is glukose. Vir brein- en liggaamsgesondheid moet bloedglukosevlakke binne ’n smal reikwydte in balans wees. (Dit beteken die speling tussen die maksimum en minimum waardes is baie klein.) Dit word deur die hormoon insulien bestuur, asook glukagon, leptien, grelien, adiponektien en andere. Insulien word deur die beta-selle in die pankreas vervaardig, en dan op grond van die glukosevlakke in die bloed vrygestel. Ná ’n maaltyd sal insulienvlakke styg, sodat die glukose die selle kan binnegaan om aangewend te word as brandstof vir energie om selfunksie aan te dryf.

Diabetes word gediagnoseer wanneer daar nie genoeg insulien deur die pankreas afgeskei word nie, of wanneer die selle se insulienreseptore op die selmembraan minder sensitief is vir insulien. Dit begin dan as insulienweerstandigheid, maar met die potensiaal om in volskaalse diabetes om te sit.

WAT IS DIABETES?

Diabetes is ’n geneties oorgeërfde of leefstylsiekte wat deur abnormale bloedsuiker- (glukose-) energiemetabolisme veroorsaak word weens die wanfunksionering van insulien. Diabetes kom voor wanneer die liggaam nie genoeg insulien kan vervaardig nie, of nie in staat is om insulien doeltreffend te gebruik nie. Die hooffunksie van insulien is om dit vir bloedsuiker moontlik te maak om selle binne te gaan, waar dit vir energie gebruik word. Wanneer die uitwerking van insulien dus ingeperk word of afwesig is, bly bloedglukose hoog en raak mettertyd potensieel skadelik vir liggaamsweefsel.

Belangrike faktore wat die risiko vir diabetes verhoog, sluit oorgewig of vetsug in, swak dieet, fisieke onaktiwiteit en hoë stresvlakke. Dit was voorheen ’n siekte wat byna uitsluitlik met volwassenes verbind is, maar omdat jonger mense dikwels fisies minder aktief is, terwyl hulle terselfdertyd te veel eet, neem die voorkoms van tipe 2-diabetes ook onder kinders en adolessente toe. Indien iemand anders in die familie diabetes het, is die risiko selfs hoër.

Diabetes (soos hoë bloeddruk of hipertensie) word dikwels ’n stil siekte genoem omdat mense met tipe 2-diabetes baie keer onbewus is dat hulle daaraan ly. Dit is een van die hoofredes waarom gereelde gesondheidsondersoeke so belangrik is.

SOORTE DIABETES

Daar is drie soorte diabetes: tipe 1- of jeugaanvangs-diabetes, tipe 2- of volwasse-aanvangs-diabetes en swangerskapdiabetes (dikwels onder tipe 2 geklassifiseer) wat tydens swangerskap in die ma ontwikkel en aan haar ongebore baba oorgedra kan word. Swangerskapdiabetes neem oor die wêreld heen toe. Vroue wat ’n weerstandigheid vir insulien en gevolglik hoë bloedglukose tydens swangerskap ontwikkel, word met swangerskapdiabetes gediagnoseer. Dit is geneig om tydens die 24ste week van swangerskap voor te kom. Onbeheerde swangerskapdiabetes kan ernstige gevolge vir ma én baba inhou.

Tipe 1-diabetes

Tipe 1-diabetes verskyn in die kinderjare of puberteit en soms in jong volwassenes (meestal voor die ouderdom van 30). Minder as 15 persent van diabete het tipe 1-diabetes. Dit is ’n ernstiger vorm as tipe 2-diabetes en vereis gereelde insulieninspuitings. Dit word hoofsaaklik deur ’n outo-immuunwanfunksie veroorsaak. Dit beteken dat die liggaam se immuunstelsel sy eie selle aanval en vernietig, naamlik daardie selle wat die hormoon insulien in die beta-selle van die pankreas vervaardig. Altesaam 75 persent van insulienafhanklike diabete het teenliggaampies teen hulle pankreasselle. Dit lei daartoe dat daar te min insulien is om die suiker uit die bloed na die vet- en spierselle te vervoer.

Tipe 1-diabete moet gewoonlik daagliks vir die res van hulle lewe insulieninspuitings kry. Hulle kan egter hulle insulienbehoeftes verminder deur die regte voedselaanvullings en spesifieke kruiemiddels te gebruik, onderliggende vasgekeerde en moontlik oorgeërfde emosies in ag te neem, asook ’n paar leefstylveranderinge te maak, soos gereelde oefening, ontspanningstegnieke en beter koskeuses. Die doel van tipe 1-diabete behoort te wees om insulienvereistes so laag moontlik, en veral die kardiovaskulêre stelsel so gesond moontlik, te hou.

Leefstylveranderinge sluit in gesonde eetgewoontes met onverfynde kosse wat ’n lae glisemiese indeks (GI) het, volgraanprodukte met ’n hoë voedingswaarde, koolhidrate, hoë veselinname, vars groente en beperkte vrugte (drie per dag), genoegsame inname van proteïen en gesonde olies, geen alkohol (dit verhoog die bloedsuikervlakke), dieselfde aanvullings as vir tipe 2-diabetes, baie oefening, daaglikse ontspanning en stresbestuur. Hoë stresvlakke ontlok en bespoedig of versnel hipoglukemiese aanvalle en maak dit ook uiters moeilik vir tipe 1-diabete om hulle bloedsuikervlakke te beheer.

Glisemiese indeks (GI) is ’n meting wat gedoen word op voedsel wat koolhidrate bevat, met betrekking tot die uitwerking van die voedselsoort op bloedsuiker. GI meet die invloed van voedsel op werklike bloedsuiker. Koolhidrate word geklassifiseer as baie laag, medium of hoog in GI-waarde. Voedsel met ’n hoë GI (onverfynde brood, gebak, lekkers, witsuiker) laat bloedsuiker vinnig styg, met ’n skielike styging in insulienvlakke om die glukose uit die bloed na die insulienafhanklike selle te vervoer, terwyl kos met ’n lae GI (volgraan, op ’n meulsteen gemaal, rogbrood, bruinrys, hawermout, quinoa) ’n meer geleidelike vrystelling van glukose uit die dermkanaal na die bloedstroom verseker, met ’n stadige afskeiding van insulien uit die pankreas en ’n geleidelike absorpsie van glukose uit die bloed tot binne in die selle – dus baie gesonder en meer gebalanseerd.

Tipe 2-diabetes

Tipe 2-diabetes (volwasse) begin gewoonlik in die middeljare of tydens swangerskap (dan word dit swangerskapdiabetes genoem). Dit is die meer algemene vorm van diabetes (85–95 persent van mense wat aan diabetes ly, het tipe 2-diabetes). Met tipe 2-diabetes vervaardig die liggaam insulien, maar die selle kan dit nie doeltreffend gebruik nie, omdat die insulienafhanklike selle óf hulle sensitiwiteit vir insulien verloor (m.a.w. insulienweerstandig word), óf te min insulienreseptore het.

Insulienafhanklike selle het insulien nodig om glukose op te neem: spier-, vet- en die meeste ander weefselselle. Brein-, pankreas-, rooibloed-, ingewand-, lewer en nierselle het nie insulien nodig om glukose op te neem nie.

’n Algemene oorsaak van tipe 2-diabetes is oorgewig of vetsug en te min oefening. Deur slegs ’n paar kilogram te verloor en matige oefening te doen, soos om vier keer per week ’n halfuur lank te stap, sal die toestand verbeter. Tipe 2-diabetes is geneig om in families voor te kom.

Diabetes en die komplikasies daarvan is die derde algemeenste oorsaak van dood. Diabetes kan ook kardiovaskulêre siekte (hart en bloedvate) veroorsaak of vererger. Kardiovaskulêre siekte is die hoofoorsaak van dood. Diabetes, soos hoë bloeddruk, is dikwels ’n rustende (slapende) siekte wat gevorderde skade kan aanrig voordat dit gediagnoseer word.

Die meeste tipe 2-diabete kan hulle bloedsuikervlakke beheer deur gewig te verloor (vetgewig), ’n dieet te volg wat gebaseer is op proteïen, gesonde olies, neute, sade en sorgvuldig uitgesoekte onverfynde (komplekse) koolhidrate en vesel, asook voedselaanvullings te gebruik en gereeld te oefen. Mense met ’n familiegeskiedenis van diabetes, of wie se bloedsuikervlakke in die hoë normale band (reikwydte) val, kan die siekte op dieselfde manier voorkom.

Alzheimer-siekte as tipe 3-diabetes

Studies wat deur die Brown Medical School in die VSA se navorsingspan gedoen is, het die moontlikheid van ’n nuwe vorm van diabetes geïdentifiseer nadat hulle bevind het dat insulien deur die brein sowel as die pankreas vervaardig word. Navorsers het weerstandigheid teen insulien en insulienagtige groeifaktore geïdentifiseer as ’n sleutel tot die ontwikkeling van Alzheimer-siekte.

Terwyl verhoogde bloedsuiker (hiperglisemie) tipies is van tipe 1- en tipe 2-diabetes, het ’n ander afsonderlike studie, wat deur die Universiteit van Pennsilvanië gedoen en in 2012 gepubliseer is, waar mense met reeds bestaande diabetes uitgesluit is, bevind dat Alzheimer-siekte kan ontwikkel sonder die teenwoordigheid van beduidend hoë bloedsuikervlakke in die brein.

Sommige navorsers het begin om Alzheimer-siekte tipe 3-diabetes te noem. In tipe 1-diabetes word te min insulien deur die pankreas vervaardig. In tipe 2-diabetes reageer die liggaam se selreseptore nie doeltreffend op insulien nie. Dit tas die werking van die hele liggaam aan. Dit wil voorkom of ’n soortgelyke probleem in Alzheimer-siekte voorkom, maar in plaas daarvan dat dit probleme in die hele liggaam veroorsaak, kom die uitwerking van weerstandigheid teen insulien in die brein self voor. Navorsers het bewyse hiervoor gevind toe hulle mense se brein ná dood bestudeer het. Hulle het opgelet dat die brein van diegene met Alzheimer-siekte (en nie met tipe 1- of tipe 2-diabetes nie) baie van dieselfde abnormaliteite getoon het as in die geval van dié met diabetes, insluitend verlaagde vlakke van insulien in die brein. Navorsers het toe bevind dat Alzheimer-siekte ’n breinspesifieke soort diabetes is, en gevolglik is dit tipe 3-diabetes genoem.

Indien ’n diabeet se bloedsuiker te hoog of te laag daal, stuur die liggaam stresseine na die brein. Simptome en tekens van die probleem kan verskyn as gedragsveranderinge, verwarring, stuiptrekkings of, soos in die geval van Alzheimer-siekte, dat die brein se funksie en struktuur mettertyd geleidelik agteruitgaan. Toe ’n groep navorsers die bestaande reeks studies oor Alzheimer-siekte en breinfunksie hersien het, het hulle ’n algemene bevinding in Alzheimer-siekte opgelet, naamlik die agteruitgang van die breinselle se vermoë om glukose te gebruik en te metaboliseer. Hulle het die agteruitgang vergelyk met kognitiewe vermoë, en opgelet dat die afname in glukoseverwerking die kognitiewe agteruitgang in die verswakking van geheue, onvermoë om die regte woorde te vind, gedragsveranderinge, en ander verskynsels voorafgegaan of oorvleuel het.

Wetenskaplikes het ook bevind dat namate insulienwerking in die brein verswak, neem die brein se kognitiewe vermoë af, maar die grootte en struktuur van die brein gaan ook agteruit – alles bevindinge wat waargeneem word namate Alzheimer-siekte vorder.

Navorsing is steeds aan die gang om vas te stel of tipe 2-diabetes Alzheimer-siekte kan veroorsaak. Een studie beweer dat diabetes waarskynlik kan bydra tot die ontwikkeling van Alzheimer-siekte en dit kan vererger, maar dat dit waarskynlik nie die enigste oorsaak daarvan is nie. Studies toon dat nagenoeg 50 persent van mense met tipe 2-diabetes later Alzheimer-siekte sal ontwikkel.

LAE BLOEDSUIKER

Jong meisies en vroue met lae bloedsuiker (hipoglisemie) moet bewus wees dat hulle dalk later in hulle lewe diabetes kan ontwikkel. Die feit dat hulle bloedsuikervlakke te laag daal, is ’n aanduiding van oorafskeiding van insulien deur die pankreas en/of oorsensitiwiteit van insulienreseptore op die selmembrane. Dit veroorsaak dat die selle glukose te vinnig absorbeer. Die bloedglukosevlak daal gevolglik baie laag, wat weer tot ’n daling in glukose aan die brein en insulienafhanklike selle lei. Daar is dus reeds ’n abnormale glukosemetabolisme.

Nog ’n algemene probleem met lae bloedsuiker word ‘storting’ (dumping) van bloedsuikervlakke genoem. As jy te honger word weens ongereelde eetgewoontes en boonop die verkeerde kos eet, daal jou bloedsuikervlak baie laag