Brennuvargurinn í Unnaryd

By Forfattere Diverse

Atburðarásin hófst með "venjulegum" gámabruna um mitt sumarið 2006. Þá gat enginn gert sér í hugarlund að þetta væri upphafið að tíu mánaða langri rannsókn þar sem 16 eldsvoðar voru rannsakaðir.-

• Language: Íslenska
• Publisher: SAGA Egmont
• Release date: Aug 11, 2020
• ISBN: 9788726512571

Book preview

Brennuvargurinn í Unnaryd

Eftir Ceciliu Bergstén, rannsóknarlögreglumann í lénslögreglunni í Hallandsléni.

Atburðarásin hófst með „venjulegum" gámabruna um mitt sumarið 2006. Þá gat enginn gert sér í hugarlund að þetta væri upphafið að tíu mánaða langri rannsókn þar sem 16 eldsvoðar voru rannsakaðir.

Byrjum á smávegis upplýsingum um staðinn þar sem þetta átti sér stað. Í bænum Unnaryd búa um 1100 manns. Hér þekkja allir alla. Bærinn er í sveitarfélaginu Hylte. Í nágrannabænum Hyltebruk er svæðislögreglustöð sem Unnaryd heyrir undir. Mörg húsanna á svæðinu eru sumarhús og eru mannlaus nema á sumrin.

Það fór að brenna

Í júlí 2006 kom upp eldur í gámi á endurvinnslustöðinni sem er í útjaðri miðbæjar Unnaryd. Þetta var annan miðvikudaginn í mánuðinum. Þá var markaðsdagur í bænum og mikið af fólki á ferðinni. Tilkynnt var um eldinn klukkan 18.12. Eldurinn var slökktur og lögreglan rannsakaði málið ekki frekar.

Næsti bruni varð 25. ágúst en þá brann Unnaryd-húsgagnaverksmiðjan sem stóð við sömu götu og endurvinnslustöðin. Tæknirannsóknir leiddu ekki til óyggjandi niðurstöðu um eldsupptök en verksmiðjan brann til grunna. Þegar ég kom til Unnaryd í fyrsta sinn í janúar 2007 var aðeins grunnur verksmiðjunnar eftir. Það ruglaði mig aðeins í ríminu því að ég vissi að ég var í réttri götu en fann ekki vettvang brunans.

Tveir unglingar höfðu heyrt til einhvers á ferli í skóginum í námunda við verksmiðjuna þegar eldurinn kom upp en sáu engan. Þeir voru alveg vissir um að hafa heyrt í manneskju en ekki dýri.

Þann 28. ágúst var eldur enn laus og nú var það kofi, sem stóð á akri vestur af Unnaryd, sem brann. Mjög líklegt var að kveikt hefði verið í kofanum en þó var ekki hægt að sýna fram á það með óyggjandi hætti. Þessi kofi stóð á akri í eigu fjölskyldu nokkurrar en ég kem betur að því síðar.

Í lok október var svo komið að enn einum brunanum og nú var það safnahúsið Hembygdsgården sem var í útjaðri miðbæjar Unnaryd. Í Hembygdsgården var meðal annars ómetanlegt safn