Vazhvin Oli
By P.M. Kannan
()
About this ebook
முன்பின் அறியாத ஓர் ஆணும் பெண்ணும் தம்பதிகளாகிச் சர்வ சகஜமாக எத்தனையோ காலம் பழகியவர்கள் போல் குடும்ப வாழ்க்கை நடத்தும் அதிசயத்தைப் பற்றிச் சிந்தனை செய்து பார்த்தபோது பிறந்த கற்பனை தான் வாழ்வின் ஒளிக்கு அஸ்திவாரக் கல் நாட்டியது. ஆணைப் பெண்ணோடும் பெண்ணை ஆணுடனும் பிணைத்து வைக்கக்கூடிய அற்புத சக்தியாக விளங்கும் சரீர சுகம், காந்தம் போல் வசீகரிக்கும் காம இன்பம், சித்திக்கப் பெறாதவிடத்து, தாம்பத்திய வாழ்க்கை என்ன ஆகும் என்கிற விபரீதமான எண்ணந்தான் இந்தக் கதையைப் பின்னத் தூண்டிவிட்டது. இயற்கையாகப் பிரவகிக்கும் உணர்ச்சி வெள்ளத்திலே அமிழ்ந்துபோய், அடித்துக் கொண்டு போய்விடாமல், அந்த வெள்ளத்தை எதிர்த்து எத்தனை தூரம் எதிர்ப்புறமாக வாழ்க்கைத் தோணியைச் செலுத்திக்கொண்டு போக முடியும் என்கிற மனோபாவத்துடன் இதில் இரண்டு பாத்திரங்கள் ஆட்டி வைக்கப்படுகின்றன. அதில் ஒன்று ஆண்; மற்றொன்று பெண். பெண்ணுக்கு மாத்திரம் இந்த மனோபாவத்தைச் சிருஷ்டிப்பதற்காக நமது சமூகத்திலுள்ள புராதனமான புனிதமான நம்பிக்கையொன்றைப் பிரயோகம் செய்திருக்கிறேன். அந்த நம்பிக்கை நிலைத்து நிற்கத் தக்கவாறு சந்தர்ப்பங்களும் சூழ்நிலையும் அமைக்கப்பட்டிருக்கின்றன. அப்போதுதானே எதிர்ப்புறமாகச் செல்லும் வாழ்க்கைத் தோணி இயற்கை உணர்ச்சி என்கிற வெள்ளத்தில் தத்தளிக்கும்? இந்த இரண்டு பாத்திரங்களைச் சுற்றிச் சில உப பாத்திரங்கள் இயற்கையின் நியதியை ஒட்டி வாழ்ந்து 'வளைய' வருகின்றன.
- பி. எம். கண்ணன்
Read more from P.M. Kannan
Nesam Marakkavillai Rating: 0 out of 5 stars0 ratingsMannum Mangaiyum Rating: 0 out of 5 stars0 ratingsNilave Nee Sol Rating: 0 out of 5 stars0 ratingsThevaanai Rating: 0 out of 5 stars0 ratingsPennukku Oru Neethi Rating: 0 out of 5 stars0 ratingsInba Puthaiyal Rating: 0 out of 5 stars0 ratingsKannigathaanam Rating: 0 out of 5 stars0 ratingsMalar Vilakku Rating: 0 out of 5 stars0 ratingsPenn Deivam Rating: 0 out of 5 stars0 ratingsNagavalli Rating: 0 out of 5 stars0 ratingsPavazha Maalai Rating: 0 out of 5 stars0 ratingsAnnai Bhoomi Rating: 0 out of 5 stars0 ratingsMalarum Madhuvum Rating: 0 out of 5 stars0 ratingsInba Kanavu Rating: 0 out of 5 stars0 ratings
Related authors
Related to Vazhvin Oli
Related ebooks
Vanathil Oru Maan Rating: 4 out of 5 stars4/5En Peyar Ranganayagi Rating: 0 out of 5 stars0 ratingsPuthiya Vaanam Rating: 3 out of 5 stars3/5Appa Ennai Mannichuduppa Rating: 0 out of 5 stars0 ratingsApoorva Ramayanam : Volume 2 - Anuman Kadhaigal Rating: 5 out of 5 stars5/5Manaamiyangal Rating: 0 out of 5 stars0 ratingsAzhagin Muzhumathi Neeye...! - Part - 2 Rating: 5 out of 5 stars5/5100% Rating: 0 out of 5 stars0 ratingsKadai Bommaigal Rating: 0 out of 5 stars0 ratingsPennodu Oru Kanavu Rating: 0 out of 5 stars0 ratingsKaaranamilla Kaariyangal Rating: 0 out of 5 stars0 ratingsSakkaram Nirpathillai Rating: 0 out of 5 stars0 ratingsKaathirukka Sonnaye! Rating: 5 out of 5 stars5/5Unmaiyin Darisanam Rating: 0 out of 5 stars0 ratingsAlaigal Rating: 0 out of 5 stars0 ratingsNeruppu Nila Rating: 0 out of 5 stars0 ratingsEn Priyamulla Snehithanukku Rating: 0 out of 5 stars0 ratingsChinna Chellamey! Rating: 0 out of 5 stars0 ratingsTheeyai Theendiya Thendral Rating: 0 out of 5 stars0 ratingsMaara Vendiya Paathaigal Rating: 0 out of 5 stars0 ratingsTerror, Death, Devil Rating: 0 out of 5 stars0 ratingsShurthi Bethangal Rating: 0 out of 5 stars0 ratingsAthirshtakkaatru Rating: 5 out of 5 stars5/5Nerungathey Neruppu Rating: 5 out of 5 stars5/5Ainthum Moondrum Onpathu Rating: 1 out of 5 stars1/5Anjali Rating: 0 out of 5 stars0 ratingsPasithalum Puli... Rating: 0 out of 5 stars0 ratingsYaarum Sollatha Kathaigal Rating: 0 out of 5 stars0 ratingsNeruppu Nila Rating: 0 out of 5 stars0 ratingsUndhan Manam Nandhavanam Rating: 5 out of 5 stars5/5
Reviews for Vazhvin Oli
0 ratings0 reviews
Book preview
Vazhvin Oli - P.M. Kannan
http://www.pustaka.co.in
வாழ்வின் ஒளி
Vazhvin Oli
Author:
பி.எம். கண்ணன்
P.M. Kannan
For more books
http://www.pustaka.co.in/home/author/pm-kannan
Digital/Electronic Copyright © by Pustaka Digital Media Pvt. Ltd.
All other copyright © by Author.
All rights reserved. This book or any portion thereof may not be reproduced or used in any manner whatsoever without the express written permission of the publisher except for the use of brief quotations in a book review.
பொருளடக்கம்
1. சௌந்தரிய தேவதை
2. தபஸ்வியின் தரிசனம்
3. விநோத மனுஷ்யர்!
4. அதே சந்நியாசி
5. நாக சர்ப்பம்
6. மாப்பிள்ளை வந்தார்!
7. மாடி அறையில்
8. பெண் மனம்
9. சாரதா
10. செங்கமலத்தின் ஆசை
11. குளக்கரையில்
12. இயற்கையும் எதிர்ப்பும்
13. ஈசுவர சங்கல்பம்
14. பிரயாணி
15. நாச்சியாரம்மாள்
16. கடிதமும் பதிலும்
17. சலனம்
18. மூடுமந்திரம்
19. 'அவர் எங்கே?'
20. நாச்சியாரம்மாளின் கோபம்
21. பெண்ணைப் பெற்றவர்
22. 'புகுந்த இடம்'
23. ராஜலக்ஷ்மி
24. தர்ம சங்கடம்
25. ரங்கநாதன்
26. ‘பெண்ணா இவள்!'
27. நாச்சியாரம்மாள் தர்பார்
28. அத்தையின் கூத்து
29. கண்ணும் மனமும்
30. ‘அடித்த கை'
31. உணர்ச்சியின் வேகம்
32. எதிர் பாராதது
33. தாம்பத்திய நாடகம்
34. திடும் பிரவேசம்
35. ஆணும் பெண்ணும்
36. புதியவள்
37. போராட்டம்
38. பாத பூஜை
39. சுகம் எங்கே?
40. பணம் வந்தது
41. பிரார்த்தனை
42. அடுத்த வீட்டுக்காரி
43. தீர்மானம்
44. இருளிலிருந்து
45. வாழ்வின் ஒளி
இந்த நாவல்
இந்த நாவலைச் சமர்ப்பணம் செய்யவேண்டியது என் கடமை. ஆனால் சம்பிரதாயத்தை ஒட்டிச் செய்யப்படும் இப்பேர்ப்பட்ட காரியத்தினால் மட்டும் நான் அவர்களைத் திருப்தி செய்து விட விரும்பவில்லை. அவர்களது சிந்தனா சக்திக்கு இந்த நாவலில் கொஞ்சம் கடினமான வேலையைத்தான் கொடுத்திருக்கிறேன் என்பது என் துணிபு. வேலை சற்றே கடினமாயினும் அதை அவர்கள் பொருட்படுத்தாத விதமாகக் கதை சுவாரஸ்யமாக அமைந்துவிட்டதே, அது என் பாக்கியம். இந்தப் பாக்கியத்தை என் வெற்றி என்று கூடச் சொல்லப் போகிறார்கள்; நிச்சயமாகத் தெரியும் எனக்கு.
இத்தனை உறுதியுடன் கூற எனக்கு எங்கிருந்து தைரியம் வந்தது தெரியுமா? ரஸிகர்களிடம் இருந்து தான். இதை பாராட்டியும் விமர்சனம் செய்தும் அத்தியாயம் அத்தியாயமாக அபிப்பிராயம் கூறியும் ரஸிகர்கள் எழுதியுள்ள கடிதங்கள் தாம் எனக்கு இத்தனை உறுதியை அளித்தன என்றால் அது மிகையாகாது. இப்படிச் சொல்வதால் எனக்குத் தன்னம்பிக்கையோ, ஆத்ம பலமோ இல்லை என்று முடிவு கட்டிவிட வேண்டாம். அந்த இரண்டும் இல்லாவிட்டால் நான் இன்று ஓர் எழுத்தாளனாகவே இருக்க முடியாது. இது என் முதல் அத்தியாயத்தில் ஒரு ‘சாம்பிள்’ சுய விளம்பரமே பிரதானமாயிருக்கும் இந்தக் காலத்தில் சுயவிளம்பரத்தில் பிரியமில்லாத என்னைப் போன்றவர்கள் கூட உலகம் போகிற போக்கில் கொஞ்ச தூரமாவது போய்தானே திரும்ப வேண்டும். அவ்வளவுதான் நிற்க.
முன்பின் அறியாத ஓர் ஆணும் பெண்ணும் தம்பதிகளாகிச் சர்வ சகஜமாக எத்தனையோ காலம் பழகியவர்கள் போல் குடும்ப வாழ்க்கை நடத்தும் அதிசயத்தைப் பற்றிச் சிந்தனை செய்து பார்த்தபோது பிறந்த கற்பனை தான் வாழ்வின் ஒளிக்கு அஸ்திவாரக் கல் நாட்டியது. ஆணைப் பெண்ணோடும் பெண்ணை ஆணுடனும் பிணைத்து வைக்கக்கூடிய அற்புத சக்தியாக விளங்கும் சரீர சுகம், காந்தம் போல் வசீகரிக்கும் காம இன்பம், சித்திக்கப் பெறாதவிடத்து, தாம்பத்திய வாழ்க்கை என்ன ஆகும் என்கிற விபரீதமான எண்ணந்தான் இந்தக் கதையைப் பின்னத் தூண்டிவிட்டது. இயற்கையாகப் பிரவகிக்கும் உணர்ச்சி வெள்ளத்திலே அமிழ்ந்துபோய், அடித்துக் கொண்டு போய்விடாமல், அந்த வெள்ளத்தை எதிர்த்து எத்தனை தூரம் எதிர்ப்புறமாக வாழ்க்கைத் தோணியைச் செலுத்திக்கொண்டு போக முடியும் என்கிற மனோபாவத்துடன் இதில் இரண்டு பாத்திரங்கள் ஆட்டி வைக்கப்படுகின்றன. அதில் ஒன்று ஆண்; மற்றொன்று பெண். பெண்ணுக்கு மாத்திரம் இந்த மனோபாவத்தைச் சிருஷ்டிப்பதற்காக நமது சமூகத்திலுள்ள புராதனமான புனிதமான நம்பிக்கையொன்றைப் பிரயோகம் செய்திருக்கிறேன். அந்த நம்பிக்கை நிலைத்து நிற்கத் தக்கவாறு சந்தர்ப்பங்களும் சூழ்நிலையும் அமைக்கப்பட்டிருக்கின்றன. அப்போதுதானே எதிர்ப்புறமாகச் செல்லும் வாழ்க்கைத் தோணி இயற்கை உணர்ச்சி என்கிற வெள்ளத்தில் தத்தளிக்கும்? இந்த இரண்டு பாத்திரங்களைச் சுற்றிச் சில உப பாத்திரங்கள் இயற்கையின் நியதியை ஒட்டி வாழ்ந்து 'வளைய' வருகின்றன.
கதை சுவாரஸ்யமாயிருக்கும் என்று ஏற்கனவே சொல்லிவிட்டேன். அதைப் படிக்கவிடாமல் ரஸிகர்களைத் தாமதிக்கச் செய்வது என் விருப்பமல்ல.
நமஸ்காரம்
பி. எம். கண்ணன்
தியாகராயநகர்,
28-10-46.
*****
இரண்டாம் பதிப்பு
1946 - இல் வெளியான சிறந்த நாவல் 'வாழ்வின் ஒளி' என்று தமிழ் வளர்ச்சிக் கழகம் முடிவு செய்து பரிசளித்தது. ஆனால் இந்த நாவலை நான் எழுதி முடித்த போது ‘தமிழ் வளர்ச்சிக் கழகமே' ஸ்தாபிதம் ஆகவில்லை என்று கருதுகிறேன். புத்தக ரூபமாக இது வெளியானபோதும் அந்தக் கழகம் செயலாற்றத் தொடங்கவில்லை. தமிழ் வளர்ச்சிக் கழகம் ஸ்தாபிதமாகி, 1948இல் தான் முதல் முதலாகப் பரிசுகள் வழங்கியது. அந்த ஆண்டிலே எனது 'வாழ்வின் ஒளி’க்குப் பரிசு அளித்ததற்கு என் நன்றியை இதன் மூலம் தெரிவித்துக்கொள்ளுகிறேன். எனினும் இந்த நாவலை நான் எழுதியபோது எந்தப் பரிசையும் எதிர்பார்த்து எழுதவில்லை என்பதைப் பணிவுடன் தெரிவித்துக் கொள்ளுகிறேன்.
தாம்பரம்,
8-3-54.
பி. எம். கண்ணன்
*****
1. சௌந்தரிய தேவதை
ருக்கு! ருக்கு...!! ருக்கு!!!
ருக்கு எங்கே இருக்கிறாள்? ஆயிரம்பேர் பதினாயிரம் தடவை வேண்டுமானால் அவளைக் கூப்பிட்டுப் பார்க்கட்டுமே. ருக்குவின் காதில் விழப்போகிறதா? காலையில் எழுந்திருந்தபோது இருந்தாளே, அதே ருக்குவா அவள் இப்போது? நேற்று அவள் எப்படி இருந்தாளோ, அப்படித்தான் இன்று காலையிலும் இருந்தாள். ஆனால் அதெல்லாம் காலை ஒன்பது மணியுடன் சரி. ஒன்பது மணிக்குமேல் அவள் அடியோடு மாறி விட்டாளே. சாதாரணமாக, ருக்கு நடந்து வரும் போது பார்க்கவேண்டும் அன்னமும் தோகைமயிலுங்கூட அந்த நடைக்குப் பிச்சை வாங்க வேண்டும். ஏண்டி, ஒரு காரியம் சொன்னாச் சட்டுனு தான் செய்வே! நன்னாயிருக்கு! இப்படி எருமை மாடு ஆடி அசைஞ்சு அசை போட்டுண்டு நடக்கிறமாதிரி வந்தையானா, சுருக்கத்தான் காரியமாகும். நாளைக்கே போய்த் தனிக் குடித்தனம் பண்ணணுமே. ஒம்பது மணிக்கெல்லாம் இலையின் கீழே உக்கார்ந்துண்டு, ஆச்சா ஆச்சான்னு பறக்கப் போறானே. அப்போ தெரியும், இந்தச் சாய்ந்த நடையும் சாலக்கு வேலையும்
என்று செங்கமலம் பெற்ற தாயின் பிரத்தியேகமான வாஞ்சையுடனும் அங்கலாய்ப்போடும் அதிகாரம் செய்வதைக் கேட்டிருப்பவர்கள், அந்த ருக்கு வேறு, இவள் வேறு என்று எந்தக் கோவிலில் வேண்டுமானாலும் போய்ச் சத்தியம் செய்யத் தயாராயிருப்பார்கள். அப்படி மாறிவிட்டாள் ருக்கு திடீரென்று.
அன்னத்துடன் போட்டியிட்ட அவள் நடை இப்போது மானுடன் போட்டி போடுகிறது. துள்ளியோடும் புள்ளிமான்போலக் காணப்படுகிறாள் ருக்கு. இன்று காலை ஒன்பது மணி முதல் புதிதாகச் சிறகு முளைத்த பறவைக் குஞ்சு குப்பென்று இறக்கையை அடித்துக்கொண்டு வானத்தில் கிளம்பித் தொபீரென்று கீழே விழுமே, அந்த மாதிரியான தடுமாற்றம் அவள் நடையில் இருந்தது; அவளது ஒவ்வொரு செய்கையிலும் இருந்தது. அவள் நடந்தாளா, ஓடினாளா, பறந்தாளா என்று சொல்ல முடியாது. அடக்கமும் கனிவும் ததும்பும் அவளது கரு விழிகளில் இன்று ஓர் அபூர்வமான பிரகாசம் தெரிந்தது. அவள் உள்ளத்தில் பொங்கிக்கொண்டிருந்த எல்லையற்ற ஆனந்தம், சொல்ல முடியாத வெட்கம், அந்தரங்கமான ஒரு திகில், திகைப்பு எல்லாம் அவளது அழகிய கன்னங்களுக்கு ஒத்தடம் போட்டு அவைகளைச் சிவக்கச் செய்திருந்தன. குபீர் குபீரென்று தன் நெற்றியில் அரும்பும் வியர்வை முத்துக்களை அவள் எத்தனை தடவை தான் துடைத்துக் கொள்வாள்? கை கூட ஓய்ந்து போய்விட்டது அவளுக்கு. காரணமில்லாமலா அவளது இதழ்களில் அடிக்கடி மந்தகாசம் படர்ந்து பதுங்குகிறது.
இந்தப் பதினாறு வருஷ காலமாக ஏற்படாத ஒரு புதிய அநுபவம் அவள் வாழ்க்கையில் நேர இருக்கிறது. அந்தப் புதிய அநுபவத்தை எதிர்பார்த்துத் தான் அவள் திடீரென்று ஒரு புது மனுஷியாக மாறி விட்டாளோ? ஆம். அப்படித்தான் இருக்கவேண்டும்.
செங்கமலம் என்ன அத்தனை மௌட்டீகமா, தன் பெண்ணிடத்தில் தோன்றிய திடீர் மாறுதலை உணர்ந்து கொள்ளாமல் இருக்க? அவள் கவனித்துக்கொண்டு தான் இருக்கிறாள். அவள் மனத்துக்கும் பெருமையாகத்தான் இருக்கிறது. ஆயினும் அவளுக்கு ஏன் மனசுக்குள்ளேயே, 'ஏனோ இந்தப் பெண்ணுக்கு இப்படித் தலைகாலே தெரியவில்லை? உலகிலே எல்லோருக்கும் உண்டானது தானே இது?' என்று அடிக்கடி தோன்றுகிறது? 'சீ'. இப்படி நமக்குத் தோன்றக் கூடாது' என்று தன்னைத்தானே அவள் கடிந்துகொள்ளத்தான் செய்கிறாள். இருந்தாலும் அவள் மனசு அவளுடன் ஒத்துழைக்கிறதா? அது தன் இஷ்டம் போல் என்ன என்னவோ எண்ணிக்கொள்ளுகிறது.
ருக்கு! ருக்கு!! ருக்கு... !!! அடி ருக்மிணீ... ஈ ஈ...
இன்னும் என்ன வேண்டும்? செங்கமலத்துக்குக் கோபமான கோபம் வருகிறது. ‘வெள்ளிக்கிழமையும் நாளுமாய் இந்தப் பெண் எங்கே போய்விட்டது? சாயந்தரம் விளக்கை ஏத்தினதும் சேவிக்கக்கூட இல்லாமே எங்கே தொலைஞ்சுதோ?' என்று கசந்து கொண்டே வாசல் பக்கம் வந்தாள் செங்கமலம். ஆனால் வாசலில் இருந்தால் தானே ருக்கு?
செங்கமலம் வாசலுக்கு வருவதற்கும் சாரதா எதிர்ப்படுவதற்கும் சரியாயிருந்தது. ஏன் மாமி, ருக்கு எங்கே? காலம்பர முதல் அவளைக் கண்ணிலேயே காணோமே?
என்று கேட்டாள் சாரதா.
உங்க வீட்டுக்குத்தான் போயிருக்காளோ என்னமோன்னு நெனைச்சேன். அங்கே கூட வரல்லையா அவள்?
இல்லையே. அவள் அங்கே வரவேயில்லை. காலம் பர இந்த வாசலிலே நின்றிருந்தாளே அப்போ பார்த்தது தான் அவளை.
கோவிலுக்குப் போக நாழியாறதே. இப்பவே இருட்டற சமயமாச்சு. இன்னும் எப்ப கோவிலுக்குப் போறது? எப்ப திரும்பறது?
அதற்காகத்தான் நானே வந்தேன். இன்றைக்குக் கோவிலிலே ஏதோ விசேஷமாம். ஒருவேளை ருக்கு முன்னாடியே அங்கே போய்விட்டிருப்பாளோ?
அப்படியெல்லாம் அவள் என்னண்டை சொல்லாமே கோவில் குளம்னு ஒரு நாளும் போனதில்லே. இப்படித்தான் யாரோடேயாவது பேசிக்கிண்டு உட்கார்ந்திருப்பாள். உங்க வீட்டுக்குத்தான் வரல்லேன்னு சொல்லிவிட்டாய். வேறே எங்கே போனாளோ?
உம். சரி. நான் கோவிலுக்குத் தான் புறப்பட்டேன். ருக்கு வந்தாளானால் சீக்கிரம் அவளை அனுப்புங்கள்
என்று சொல்லி விட்டு அங்கிருந்து நகர்ந்தாள் சாரதா.
சிறிது நேரம் வாசலிலேயே இந்தப் பக்கமும் அந்தப் பக்கமும் திரும்பித் திரும்பிப் பார்த்துக் கொண்டு நின்றாள் செங்கமலம். ஆனால் ருக்கு எந்த வீட்டிலிருந்தும் வரவில்லை. செங்கமலமும், 'உம்' என்று கொண்டே உள்ளே திரும்பினாள்.
கூடத்தில் ஊஞ்சல் சங்கிலிகள் 'கிரீச், கிரீச்' என்று சப்தம் செய்தது அவள் காதில் விழுந்தது. வெளி முற்றத்தில் கையெழுத்து மங்கும் மங்கலான வெளிச்சம் இருந்தது; அந்தக் குருட்டு வெளிச்சம் கூடத்திலும் பாய்ந்து ஊஞ்சலை ஆட்டிக் கொண்டு ஒய்யாரமாய் வீற்றிருந்த ஒரு யுவதியைச் செங்கமலத்துக்கு அறிமுகப்படுத்தியது.
ஏண்டீ, எங்கிருந்த டீ இங்கே வந்து மொளச்சே? ஆயிரம் தடவை கத்து கத்துன்னு கத்தினேனே. அப்பவெல்லாம் உன் காதில் விழல்லையா? ஆமாம். கோவிலுக்குப் போகவேண்டாமா? வெள்ளிக்கிழமை. விளக்கேத்தினால் சேவிக்கக் கூடச் சேவிக்காமே எங்கே போனாய்?
என்று சரமாரியாகக் கேட்டாள் செங்கமலம்.
ஆமாம். எங்கே போயிட்டேன்? எல்லாம் இங்கே தான் இருந்தேன். கொஞ்ச நாழி மாடியிலே நின்று கொண்டிருந்தேன். இதுக்குள் பிரளயமே வந்துவிட்டாப்போல அடித்துக்கொள்கிறாயே!
என்று கழுத்தை ஒரு திருப்புத் திருப்பி மோவாய்க்கட்டையை 'மளுக்'கென்று தோள் பட்டையில் இடித்துக்கொண்டே சொல்லி விட்டு, ஊஞ்சலிலிருந்து ஒரு குதி குதித்து 'ஜிவ்'வென்று சிட்டுக்குருவி போலக் கிளம்பிச் சமையலறைப்பக்கம் போனாள் ருக்கு.
நன்னாத்தாண்டியம்மா இருக்கு உன் நாட்டியம்! நல்லதைச் சொன்னா, கசக்கத்தான் கசக்கும்
என்று செங்கமலம் சொன்னதும், ருக்கு குதித்த வேகத்தில் ஊஞ்சல் உயரக் கிளம்பி ஊசலாடியதும், அதன் சங்கிலிகள் பின்னும் பன்மடங்கு அதிகமாகக் 'கிரீச்'சிட்டதும் ருக்குவின் காதில் விழுந்தனவா என்ன?
சமையலறைக்கு முன் அறையில் தான் ஆராதனைக்காகப் பெருமாள் மேடை போட்டு அதன் மேல் கோவிலாழ்வாரும், சுவரில் சுவாமி படங்களும் பொருத்தப் பெற்றிருந்தன. திருவனந்தபுரத்து வெண்கலக் குத்துவிளக்கு ஒன்று பெருமாள் மேடைமேல் நின்றிருந்தது. அந்தக் குத்து விளக்கின் பிரகாசந்தான் அறை முற்றும் பரவியிருந்தது.
ருக்கு பெருமாள் மேடையின் எதிரே போய் நின்றாள். ஒரு தடவை சுவாமி படங்களையும் கோவிலாழ்வாரையும் அவளது ஒளி நிறைந்த கண்களால் பார்த்தாள். அவள் முகத்தில் என்றைக்கும் இல்லாத ஒரு சோபை தங்கியிருந்தது. அதற்கேற்றாப்போல மேடைமேல் இருந்த குத்து விளக்கிலும் எவ்வளவு பிரகாசம்!
குத்து விளக்கில் ஒரே திரிதான் எரிந்து கொண்டிருந்தது. அந்தத் திரியின் ஒளி சாதாரணமாக அறையின் மத்திய பாகத்தை மாத்திரம் பிரகாசப்படுத்தப் போதுமானது. அறையின் மூலைகள், கதவின் இடுக்குகள், மேல் கூரையில் சில பாகங்கள் இவற்றுக்கெல்லாம் அந்தக் குத்து விளக்கின் வெளிச்சம் தெரிய முடியாது. ஆனால் அன்றைத் தினம் அறை முற்றும் துளி கூட இருட்டே தங்காதபடி தீபத்தின் ஜோதி துடைத்து விட்டிருந்தது. ஒரு குட்டிச் சூரியனைக் கொண்டு வந்து உள்ளே வைத்தது போல் இருந்தது அந்த வெளிச்சம். அதே மாதிரிதான் இருந்தது ருக்குவின் முக விலாசமும் அப்போது. அடக்கமான அழகுடன் விளங்கின ருக்கு, அப்போது ஒரு சௌந்தரிய தேவதையாகத் திகழ்ந்தாள். அழகைப் பிழிந்தெடுத்துச் செப்பனிடப்பட்டவைபோல அமைந்திருந்தன அவள் அங்கங்கள் எல்லாம். மொத்தத்தில் சொல்லப் போனால், அந்தப் பூஜாக்கிருகத்தைப் பிரகாசப்படுத்திய தீப ஒளியை விட ருக்குவின் தேஜோ மயமான வடிவம் அந்த அறைக்கு ஓர் ஒப்பற்ற அலங்காரத்தை அளித்தது.
ருக்கு வழக்கம் போலப் பெருமாள் மேடையின் எதிரே குனிந்து சேவிக்கவில்லை. அவள் கைகள் மடியில் இருந்த ஏதோ ஒன்றைப் படபடப்புடன் எடுத்தன. அந்தக் கைகளில் தான் எத்தனை நடுக்கம்! அந்த வஸ்துவை எடுப்பதற்குள் அவள் முகத்திரையில் எத்தனை நூதனக் காட்சிகள் மாறி மாறி எழுந்தன! ஆனால் மடியிலிருந்து எடுத்த வஸ்து கைகளில் நின்றதா? கைகளின் பிடியினின்றும் நழுவியது. கீழே எரிந்து கொண்டிருந்த குத்துவிளக்கில் பட்டது. சட்டென்று குனிந்தாள் ருக்கு. ஆனால் அவள் அதை எடுக்கும் போது அதன் ஒரு பாகம் தீப்பற்றிக்கொண்டு எரிந்து போய்விட்டது. நல்ல வேளை, முழுவதும் எரிந்து போகவில்லை.
ருக்குவுக்கு மனம் 'திக்'கென்றது. எரிந்து போன அந்தப் பொருளை அவள் விளக்கின் வெளிச்சத்தில் ஒரு முறை பார்த்தாள். ஆம், அது ஒரு கடிதம். அன்று காலை ஒன்பது மணிக்கு வந்தது. அந்தக் கடிதமேதான் அவளிடத்தில் அதுவரையில் காணப்படாத புதுமையைச் சிருஷ்டித்தது. அவள் உள்ளத் தில் உவகையை மலர வைத்த கடிதம் அது. அவள் நடையிலும் உடையிலும் பார்வையிலும் பேச்சிலும் பாவனையிலும் எல்லாவற்றிலுமே படபடப்பையும் வசீகரத்தையும் அளித்தது அந்தக் கடிதமேதான். ஆனால் அதே கடிதம் ஒரு பாகம் எரிந்து கருகி அவள் கையில் இருக்கிறது இப்போது. முழுக் கடிதத்தைக் கண்டு பூரித்திருந்த அவள் இருதயத்தின் ஒரு மூலையில் இப்போது ஒரு பாகம் கருகிப்போன கடிதம் கொஞ்சம் இருட்டைக் கொண்டு வந்து திணித்தது. களங்கமற்றுத் துலாம்பரமாக விளங்கின அவள் வதனத்தில், அவளது இருதயத்தில் படிந்த இருளின் சாயை லேசாகப் படர்ந்து சந்திரனுக்குள்ள களங்கத்தைப்போல் தோற்றுவித்தது.
அவள் கண்களில் ஜலம் துளும்பிற்று. அவளையும் அயாமல், 'இந்தக் கடிதத்துக்கா இந்தக் கதி ஏற்பட வேண்டும்? இந்தக் கடிதம் கருகினதுபோல, என் வாழ்வும்...' என்று ஏதோ எண்ணின அவளது மனத்தை அவள் தனது திட சித்தத்தால் தடுத்துக் கொண்டாள். ஆயினும் மறுபடியும் மறுபடியும் அதே எண்ணமோ, அதையொட்டி வேறு விதமான எண்ணமோ தோன்றுவதென்றால், அதை எப்படி அவள் தாங்குவாள்? அவள் தேகமெல்லாம் நடுங்கியது. மற்ற எண்ணங்களையெல்லாம் விட்டு, எதிரே மேடை மேல் இருந்த சுவாமியிடம் மனத்தைப் பறி கொடுக்க முயன்றாள் அவள். 'எதற்கும் சுவாமி இருக்கிறார்; அவர் காப்பாற்றுவார்' என்று பிரார்த்தித்துக் கொண்டே சாஷ்டாங்கமாகத் தரையில் விழுந்து சேவித்தாள். அவள் மெய்ம்மறந்து வணங்கும்போது அவள் கையில் இருந்த கருகிப்போன கடிதம் கையை விட்டு நழுவிப்போயிற்று.
அதே சமயத்தில் அங்கே வந்தாள் செங்கமலம். குத்து விளக்கில் எண்ணெய் வற்றிப்போய்த் திரி படர்ந்து எரிகிறது. அதனால் அறை முற்றும் சிறிது நிழல் கூட இல்லாமல் ஒரே வெளிச்சம். அந்த வெளிச்சத்தில் தன் மகள் சுவாமியை வணங்கி எழுந்திருப்பதைக் கண்டாள் அவள். ருக்கு தரையிலிருந்து எழுந்திருக்கும்போது அவள் பக்கத்தில் கிடந்த காகிதத்தைக் கவனித்தாள் செங்கமலம். அதை அவள் போய்க் குனிந்து எடுத்ததை ருக்கு பார்க்கவில்லை.
கடிதத்தைக் கையில் எடுத்துக்கொண்டு நிமிர்ந்த தாய் மகளின் முகத்தை ஏறெடுத்துப் பார்த்தாள். அவள் பார்வை அடுத்த விநாடியே படர்ந்தெரியும் விளக்கு வெளிச்சத்தின் மேல் விழுந்தது. இன்னும் சில விநாடிகளில் அணைய இருக்கும் அந்த ஜோதியைப் போல அத்தனை பிரகாசம் இவளுக்கு எங்கிருந்து வந்தது? - இப்படித்தான் நினைத்தது செங்கமலத்தின் அபலை மனசு. அவள் என்ன செய்வாள் பாவம்? பெற்றெடுத்த தாய்! வேண்டுமென்றா அப்படி நினைப்பாள்? ஆனால் அவள் மனத்தின் ஓட்டத்தை அவளால் கட்டிப் பிடித்து அடக்க முடியவில்லையே!
ருக்கு எழுந்து நின்று கொண்டு இரு கைகளையும் கூப்பி மனத்திற்குள்ளேயே ஸ்தோத்திரம் செய்தாள். அவள் தாய் அவளுக்குப் பின்புறத்திலேயே நின்று கொண்டு கையில் இருந்த கடிதத்தைப் பார்த்தாள். ஆம், மாப்பிள்ளை எழுதியிருந்த கடிதம். அன்று காலையில் வந்தது தான். அந்தக் கடிதமா விளக்கில் கொளுத்தப்பட்டிருக்கிறது?
இது என்ன காரியம்? ருக்குவா இப்படிச் செய்தவள்? செங்கமலத்தால் நம்ப முடியவில்லை. அவள் மனம் பதைபதைத்தது. ஏண்டீ ருக்கு, இதென்ன காரியம்? இந்தக் கடுதாசியை இப்படியா கொளுத்துவது?
என்று வெடுக்கென்று கேட்டு விட்டாள்.
தாயின் குரலைக் கேட்டுச் சட்டென்று திரும்பினாள் ருக்கு. நான் கொளுத்தவில்லையம்மா. கை தவறி விழுந்து...
அவளால் வார்த்தையை முடிக்க முடியவில்லை. ஏதோ ஒன்று தொண்டையை அடைத்தது போல் இருந்தது.
செங்கமலத்துக்கு மனசில் 'சிவுக்'கென்றது. இன்னும் அப்பா பார்க்கல்லையே இதை? இப்படி எதை எடுத்தாலும் என்ன தவறல் வேண்டியிருக்கு! இதைக் கொண்டு போய்க் கொடுத்தால் அவர் என்ன சொல்லுவார்?
என்றாள் செங்கமலம்.
நான் என்ன செய்வேன்! வேண்டுமென்றா விளக்கில் போட்டேன்?
என்று கூறி ருக்கு மேலும் ஏதோ சொல்லப் போனாள். அதற்குள் வேண்டுமென்றே செய்வதுபோல, விளக்குக்கு நேராக உயரத்தில் வட்டமிட்டுக் கொண்டிருந்த ஒரு விட்டில் சரேலென்று விளக்கின் மேல் பாய்ந்தது. படர்ந்து எரிந்து கொண்டிருந்த தீபத்தின் ஒளியை அது அணைத்து விடும் போலிருந்தது ஒரு விநாடி. அந்த விட்டில் பூச்சி விளக்கின் மீது விழுந்த வேகத்தில் அறையில் ஒரு கணம் அந்தகாரம் சூழ்ந்தது. ஆனால் மறுவிநாடியே மீண்டும் விளக்கின் வெளிச்சம் தெரிந்தது. எனினும் விளக்கில் விழுந்த விட்டில் அங்கே இறந்து கிடக்கவில்லை. அது எங்கே மாயமாய் மறைந்ததோ?
அதோ தீபத்தில் ஒளி இன்னும் இருந்து கொண்டிருக்கிறது. அதை விழுங்க வந்த விட்டில் தோல்வியுற்று மறைந்தது. ஆயினும் அந்த ஒளி நிரந்தரமான ஒளி அல்ல. நின்று நிதானித்து எரியும் தீபத்தின் ஒளியல்ல அது. எண்ணெயில்லாமல் படர்ந்தெரியும் விளக்கின் பிரகாசம். அதை விழுங்க ஒரு விட்டில் வேண்டாம். அது தானாகவே சில விநாடிகளில் மறைந்து விடும். ஆனால் அந்த ஒளி மறையக் கூடாதே என்று தான் எண்ணினாள் செங்கமலம். அவள் மனத்தில் என்ன தோன்றியதோ என்னவோ? ருக்கு, இப்படி வா, நாழியாச்சு. கோவிலுக்குப் போய்வரலாம்
என்று சொல்லிக்கொண்டே கடிதமும் கையுமாய்ப் பூஜை அறையை விட்டு வெளியே போனாள். ருக்குவும் தாயைப் பின் தொடர்ந்து மௌனமாகவே சென்று கூடத்து ஊஞ்சலில் உட்கார்ந்துகொண்டாள். ஊஞ்சலும் 'கிரீச்'சிடத் தொடங்கிற்று.
செங்கமலம் கூடத்திலிருந்து ஏதோ நினைத்துக் கொண்டவள் போல உள்ளே போனாள். பூஜை அறையில் விளக்கு அணையும் தறுவாயில் இருந்தது. அறையில் சற்று முன் இருந்த பிரகாசம் போய் இருள் கொஞ்சமாகப் பிரவேசித்துக்கொண்டிருந்தது. சட்டென்று மாடத்திலிருந்த ஒரு புதுத் திரியை எடுத்து எண்ணெயில் நனைத்து அணைந்து கொண்டிருக்கும் தீப ஒளியில் அதை ஏற்றிக் குத்து விளக்கில் இட்டாள். பிறகு அதற்கு எண்ணெயும் வார்த்தாள். அடியோடு அணைய இருந்த தீபம் மறுபடியும் அறையில் ஒளி வீசலாயிற்று. செங்கமலத்தின் மனத்திலும் ஒரு விதமான நிம்மதி ஏற்பட்டது போலிருந்தது இப்போது. சுவாமி முன்னிலையில் ஒரு தரம் வணங்கி எழுந்து கூடத்துப் பக்கம் வந்தாள்.
ஊஞ்சல் மெதுவாக ஆடிக்கொண்டிருந்தது. அதன் ஒரு சங்கிலிமேல் முதுகைச் சாய்த்த வண்ணம் ஏதோ யோசனையில் ஆழ்ந்திருந்தாள் ருக்கு.
ருக்கு!
அம்மா!
ஒரு சமாசாரம்.
என்ன?
அப்பா வரும் சமயமாச்சு. அந்தக் கடுதாசியை அவர் இன்னும் பார்க்கல்லே. பார்த்தாலும் மூளியா இருக்கிறதைப் பார்த்துக் கோவிச்சுக்குவார். அவரண்டை அதைப்பத்தி ஒண்ணும் சொல்லாதே.
அது எப்படியம்மா முடியும்? அவர் வருகிறதாக எழுதியிருக்கிறாரே. அப்பாவுக்குச் சமாசாரம் தெரியாமற் போனால்?
நான் எப்படியாவது சமாசாரத்தை அவருக்கு எட்ட வைத்து விடறேன். நீ சும்மா இரு. கடுதாசியை எங்கேயோ கை தவறி வச்சுவிட்டதாக நான் சொல்லி விடறேன். இல்லாமப்போனா, இந்த மூளிக் கடுதாசியைப் பார்த்து, அவர் விஷயம் தெரிஞ்சா ரொம்ப ஆத்திரப்படுவார். மனசும் ரொம்பக் கஷ்டப்படும் அவருக்கு.
அம்மா, எனக்கென்னமோ பயமாயிருக்கு இதெல்லாம்...
அசடு, அதெல்லாம் ஒண்ணும் இல்லே. உள்ளே போய்ச் சுவாமி சந்நிதியிலே இன்னொரு தரம் சேவிச்சு விட்டு, கொஞ்சம் தாயார் குங்குமத்தை இட்டுண்டு வா. அப்பா வரதுக்குள்ளே கோவிலுக்குப் போய்த் திரும்பி விடலாம்.
ருக்கு அதற்குமேல் ஒன்றும் பேசவில்லை. தாயின் வாக்கு அவளுக்குத் தெய்வ வாக்குப்போல் இருந்தது அத்தருணத்தில். ஊஞ்சலை விட்டு எழுந்தாள். உள்ளே போனாள். ஆனால், 'உள்ளே இதற்குள் விளக்கு அணைந்துபோய்ச் சுவாமி சந்நிதியில் ஒரே இருட்டாயிருக்குமே!' - இந்த நினைவு அவள் மனத்தில் கலக்கத்தை உண்டாக்கியது. ஆயினும் அவள் கால்கள் அவளையும் மீறிப் பூஜை அறையண்டை அவளை அழைத்துச் சென்றன. அங்கே அவள் கண்ட காட்சி என்ன? அவளுக்கே ஆச்சரியமாயிருந்தது.
குத்துவிளக்கு எரிந்து கொண்டிருக்கிறது. அணைவதற்கு முன் அந்த அறையில் தெரிந்த ஒரு பேய்ப்பிரகாசம் அப்போது காணப்படவில்லை. நின்று தணிந்து எரியும் அந்த அழகிய இயல்பான ஒளியின் முன் அஞ்சலி செய்து நிமிர்ந்தாள் ருக்மிணி.
ருக்கு, நாழியாச்சு, வா
என்று கூடத்திலிருந்து தாயின் குரல் கேட்டது.
ருக்கு கூடத்துக்கு வந்தபோது செங்கமலம் ஒரு தட்டில் வெற்றிலை, பாக்கு, தேங்காய், புஷ்பம் முதலிய நிவேதனப் பொருள்களுடன் நின்று கொண்டிருந்தாள்.
அப்போதுதான் வெளியில் சென்றிருந்த தேவராஜ ஐயங்கார், ருக்கு!
என்று கூப்பிட்டுக்கொண்டே வந்தார்.
தேவராஜ ஐயங்கார் உள்ளே வந்ததும் கூடத்தில் வெற்றிலை பாக்குத் தட்டுடன் நின்றிருந்த செங்கமலத்தைப் பார்த்தார். ஏண்டீ, இதை வைத்துக்கொண்டு இங்கே நின்றிருந்தால் என் மூக்கிலே மணக்குமா என்ன? ஏது ராஜமரியாதையாயிருக்கிறதே. வாசற் படியண்டை வைத்துக்கொண்டு நின்றால் ஜோராயிருக்கும். என்ன, என்றைக்கும் இல்லாதபடி இன்று இத்தனை உபசாரம் எனக்கு?
என்று கிண்டலாய்க் கேட்டார்.
போதும். கொழந்தை இல்லாத வீட்டிலே கெழவன் துள்ளி விளையாடினானாம். அந்த மாதிரி தான் இருக்கு நீங்க பண்ணறது. கோவிலுக்குப் போகலாம்னு புறப்பட்டேன். அதுக்குள்ளே நீங்களும் வந்தேக. இதுக்குப் போய் இத்தனை கேலியா? ஏதுடா பக்கத்திலே குதிராட்டமா வளர்ந்த பொண் ஒருத்தி இருக்காளேன்னு கூடத் தோணல்லியே ஒங்களுக்கு?
என்று புது நாட்டுப் பெண் போல நாணிக் கோணிக்கொண்டு பேசினாள் செங்கமலம். அவள் முகத்தைப் பார்த்தால் பதினைந்து வயசு திடீரென்று குறைந்து போய்விட்டதுபோலத் தோன்றிற்று.
அப்பா வேடிக்கையாகப் பேசுவதைக் கேட்டதும் ருக்மிணிக்கே சிரிப்பு வந்தது. சற்று முன் மனத்தில் நிகழ்ந்த போராட்டத்தைக் கூட மறந்தாள் அவள். அம்மா, அந்தத் தட்டை இப்படிக் கொடு. நான் மாத்திரமாவது கோவிலுக்குப் போய்விட்டு, சாரதா வரும்போது கூட வந்து விடுகிறேன்
என்றாள் சங்கோசத்துடன்.
இதோ இரு. அப்பாவுக்குக் கொஞ்சம் காபி கொடுத்துவிட்டு வந்துடறேன்
என்றாள் செங்கமலம்.
இப்போதே இருட்டிவிட்டது. இரண்டு பேருமே போங்கள். காபி கீபியெல்லாம் நானே எடுத்துச் சாப்பிட்டுக்கொள்ளுகிறேன்
என்றார் தேவராஜ ஐயங்கார்.
ஆமாம். போருமே சவரணை. உங்களுக்கு அவ்வளவு தெரிஞ்சிருந்தா நான் என் இப்படி இருக்கேன்? அங்கே அலமாரியிலே ஓரிடத்திலே எருமைப் பால் வச்சிருக்கு. இன்னோரிடத்திலே பசும்பால் வச்சிருக்கு. ஒண்ணுக்கொண்ணு தெரியாமே எதையாவது எடுத்து என்னமாவது பண்ணி வைப்பேக. காபி டிகாஷன் அடுப்பு மேலே வச்சிருக்கேன். பக்கத்திலேயே அப்பளாம் பொரிச்ச எண்ணெயை அடுக்கிலே கொட்டி வச்சிருக்கேன். டிகாஷ்னுக்குப் பதில் எண்ணெயை எடுத்துப் பாலிலே கலந்து வைப்பேக. நீங்க வெறுமே இருங்கோ. அஞ்சு நிமிஷத்திலே ஒரு அர்ச்சனை பண்ணி வச்சுட்டு வந்தூடறேன்
என்று சொல்லி விட்டுச் செங்கமலம் கிளம்பினாள். ருக்குவும் தாயைப் பின் தொடர்ந்தாள்.
தேவராஜ ஐயங்கார் சகதர்மிணியின் உத்தரவை மீற முடியாமல் ஊஞ்சலில் உட்கார்ந்து கொண்டார். ஊஞ்சல் கிரீச்சிட்டுக்கொண்டே அசையத் தொடங்கியது.
*****
2. தபஸ்வியின் தரிசனம்
கோவிலில் சாதாரணமாகவே வெள்ளிக்கிழமையன்று கூட்டம் அதிகம். அன்றைத் தினம் ஏதோ ஒரு திருநாள். சுற்றுப் பக்கத்தில் இருக்கும் கிராமங்களிலிருந்து ஜனங்கள் வந்திருந்தார்கள். கோவில் பிரம்மாண்டமான கோவிலல்ல. சின்னக் கிராமக் கோவில்களைப் போன்றது தான் அது. எனவே சுமார் இருநூறு ஜனங்கள் வந்தாலும் இரண்டாயிரம் பேர் போலக் காட்டும். அன்றைத் தினம் கேட்க வேண்டுமா?
கூட்டத்தைக் கண்டு ஒரு கணம் செங்கமலமே பிரமித்துப் போனாள். இந்தக் கூட்டத்தில் நுழைந்து போய்த் தாயார் சந்நிதியில் ஓர் அர்ச்சனை செய்துவிட்டுத் திரும்புவது பிரம்மப் பிரயத்தனமாக இருக்கும் போல் தோன்றிற்று அவளுக்கு. வீட்டில் தன் கணவர் தான் வருவதற்குள் அவசரப்பட்டுக்கொண்டு பாலைக் கொட்டி, மோரைக் கொட்டி ஒன்றுக்கொன்று குழறுபடியாக ஏதாவது செய்துவைக்கப் போகிறாரே என்கிற அலைச்சல் அவளுக்கு. அர்ச்சனை பண்ணாவிட்டால் போகிறது. வீட்டுக்குத் திரும்பி விடலாம் என்று கூடத் தோன்றிற்று.
என்றைக்கும் போல அவள் மனம் அன்றைக்கும் இருந்திருந்தால், கோவிலுக்கு வந்தது போதும் என்று, ருக்குவையும் திருப்பி அழைத்துக்கொண்டு வீடு போய்ச் சேருவாள். ஆனால் சற்று முன் நிகழ்ந்த சம்பவம் அவள் மனத்தின் ஒரு மூலையில் குறுகுறுத்துக்கொண்டேயிருந்தது. கண்ணைக் கெட்டியாக மூடிக்கொண்டு மனத்தைத் திறந்து தாயார் முன்னிலையில் வேண்டிக் கொண்டால் தான் மனத்திலிருந்த பளுவானது குறையுமென்று தோன்றிற்று அவளுக்கு. எனவே கூட்டத்தையும் பாராமல் மெல்ல மெல்ல முன்னேறித் தாயார் சந்நிதியை அடைந்தாள் அவள். ருக்குவும் அவளைப் பின்பற்றியே நடந்தாள்.
தாயார் சந்நிதியில் அர்ச்சனை செய்து முடிந்தது. ருக்குவுடன் செங்கமலம் சந்நிதியை வலம் வந்து வீடு திரும்ப எண்ணினாள். சந்நிதிப் பிராகாரத்தில் இருவரும் நடந்து சென்றபோது பின்புறத்திலிருந்து, ருக்கு, ருக்கு
என்று கூப்பிட்டுக்கொண்டே வந்தாள் சாரதா.
ருக்கு திரும்பிப் பார்த்தாள். செங்கமலமும் நின்றாள்.
ஏன் மாமி, எத்தனை தரம் கூப்பிடறது? கும்பலிலே கத்து கத்துன்னு கத்தினேனே. காதிலேயே விழவில்லை போலிருக்கு
என்றாள் சாரதா.
கூப்பிட்டயா என்ன? இந்தச் சந்தை இரைச்சலிலே காது எங்கே கேட்கிறது? ஒரே கோஷம்!
ஆமாம். நீங்கள் போகிற அவசரத்தைப் பார்த்தால் கோவிலுக்கு வந்தவர்கள் போல இல்லையே! ஏதோ ஸினிமாவுக்கு அவசர அவசரமாய்ப் போகிற மாதிரி இருக்கிறதே.
இல்லேடீ நாங்க பொறப்படற போது தான் மாமா ஆத்துக்கு வந்தார். காலம்பரச் சாப்பிட்டு விட்டுப் போனவர்; இன்னும் காபி கூடக் கொடுக்கல்லே. அதுக்கோசரந்தான் சீக்கிரமே திரும்பிப் போறேன்
ஆமாம். ஆண்டாள் சந்நிதிப் பக்கம் போகவில்லையா?
இல்லே. இன்னொரு நாள் சாவகாசமாப் போனாப் போறது. இப்ப நேரா வீட்டுக்குப் போகணும்.
அட ராமா! உங்களுக்குச் சமாசாரம் தெரியாதா?
என்ன சமாசாரம்? ஒண்ணும் தெரியாதே!
ஆண்டாள் சந்நிதி மண்டபத்திலே சாயங்காலம் முதல் ஒரு சந்நியாசி வந்து உட்கார்ந்து கொண்டிருக்கிறாராம். பார்த்தால் மகா தபஸ்வி மாதிரி இருக்கிறதாம். எல்லோரும் போய்த் தரிசனம் பண்ணிவிட்டுப் போகிறார்களே.
உம். உத்ஸவகாலமோன்னோ? யாராவது தேசாந்திரியாத் திரியறவாளாயிருக்கும். ஊர் ஊராப் போறபோது இங்கே வந்திருக்கலாம். அவாளைப் போய் நாம் என்னத்துக்குப் பார்க்கிறது?
இல்லை, இதுவரையில் இந்தமாதிரி ஒரு தபஸ்வி இங்கே வந்ததே கிடையாதென்று பேசிக்கொள்ளுகிறார்கள். ரொம்ப வயசானவர் போலக் காணப்படுகிறாராம். சாக்ஷாத் நாராயணனே இந்த ரூபத்தில் வந்திருக்கிற மாதிரி, அத்தனை தேஜஸுடன் இருக்கிறாராம் அவர்
என்று சாரதா கூறியதைக் கேட்ட ருக்கு, ஏன் அம்மா, அப்படிப் போய்த்தான் பார்த்து விட்டுப் போகலாமே
என்றாள்.
இப்பவே இருட்டி ரொம்ப நாழியாச்சு. உங்க அப்பா பட்டினியும் பசியுமாக் காத்துண்டிருப்பார். நான் போறேன். நீ சாரதாவோடே போய்ப் பார்த்து விட்டுச் சுருக்கத் திரும்பி வந்து விடு
என்று சொன்னாள் செங்கமலம்.
சாரதாவும் ருக்குவும் ஆண்டாள் சந்நிதிக்குப் போகக் கிளம்பினார்கள். செங்கமலம் வீட்டுக்குப் புறப்பட்டாள்.
ஆண்டாள் சந்நிதி மண்டபத்தின் ஒரு தூணில் சாய்ந்தபடி ஒரு பெரியவர் உட்கார்ந்திருந்தார். அவரைச் சுற்றி ஒரே கூட்டம். கோவிலுக்கு வந்திருந்த ஜனங்களில் பாதிப் பேருக்குமேல் அந்தப் பெரியவரைச் சுற்றி நின்றிருந்தார்கள். அவர் கண்மூடி நிஷ்டையில் இருப்பவர்போலக் காணப்பட்டார். சாரதாவும் ருக்குவும் அவர் அருகில் போக முடியாதபடி ஜனத்திரள் மறைத்துக்கொண்டு நின்றது. எனவே சாரதா மண்டபத்துக்குச் சற்றுத் தூரத்தில் பிராகாரத்தில் இருந்த ஒரு சிறு சந்நிதியண்டை போய் ருக்குவுடன் உட்கார்ந்து கொண்டாள்.
சற்று நேரம் இரண்டு பேரும் பேசவில்லை. மௌனமாயிருந்தனர். ருக்கு ஏதோ யோசனையில் ஆழ்ந்திருப்பது போலத் தோன்றியது சாரதாவுக்கு.
ருக்கு!
என்றாள் மெதுவாக.
ருக்கு சாரதாவைப் பார்த்தாள்.
காலை முதல் உன்னைக் காணவே காணோமே. எங்கே போயிருந்தாய்?
ருக்குவுக்கு அன்றைய நிகழ்ச்சிகளைத் தூண்டி விட்டது போலிருந்தது சாரதாவின் கேள்வி.
சாரதா!
என்றாள்.
அவள் முகத்தைப் பார்த்தால் சொல்ல வந்த விஷயத்தைச் சொல்லலாமா வேண்டாமா என்று தடுமாறுவதுபோலத் தோன்றிற்று சாரதாவுக்கு.
ருக்கு, ஏன்? என்ன சமாசாரம்? என்னிடம் சொல்லக் கூடாத விஷயமா?
என்றாள்.
அப்படி ஒன்றும் இல்லை.
கோவில் பிராகாரத்தில் தொங்கிக்கொண்டிருந்த தீபத்தின் மங்கிய வெளிச்சத்தால் ருக்மிணியின் கண்களில் நீர் தேங்கி நிற்பதைப் பார்த்தாள் சாரதா.
ருக்கு, உன் மனசு இத்தனை சங்கடப்படும்படியான விஷயம் என்னடீ, சொல்லேன்
என்றாள் மிருதுவான குரலில்.
அவர் வரப்போகிறாராம். என்னை அழைத்துக் கொண்டு...
சாரதா கலகலவென்று சிரித்த சிரிப்பின் எதிரொலி அந்த இடத்தையே கிடுகிடுக்கச் செய்து விட்டது. அடி அசடே, அகத்துக்காரர் வந்து அழைத்துக் கொண்டு போகப் போகிறார் என்றால் ஒரு பெண்ணுக்கு எத்தனை சந்தோஷம் இருக்கும்? நீ நேர்மாறாக இருக்கிறாயே. இதில் விசனப்பட வேண்டிய விஷயம் என்ன இருக்கிறது...? உம் ஐயோ பாவம்! பச்சைக் குழந்தை. அம்மா அப்பாவை விட்டுப் பிரிய மனசு வரவில்லையோ! அடி கர்நாடகம்!
என்று கிண்டல் செய்தாள் சாரதா.
ஆனால் அவள் மேலும் பரிகாசம் செய்யாமல் தடை செய்தாள் ருக்கு.
காலை ஒன்பது மணிக்குத் தன்