My broer, Deon van der Merwe, en sy vrou, Danielle, se heel eerste staptog was vier jaar gelede op Suikerboschfontein. Sedertdien kan hulle by famieliekuiers steeds nie uitgepraat raak oor die naweekroete óf die plaas buite Carolina, Mpumalanga, nie. Dit gaan ook gewoonlik gepaard met die gespog van foto’s op hulle selfone. Foto’s van ’n voetpad wat deur diep valleie kronkel, watervalle en strome, leertjies waarmee ’n mens teen rooi kranse uitklouter… Met die eerste melding van Suikerboschfontein was ek reeds vas oortuig om ook die roete te stap, maar ek en my man, Hancu, kon vanjaar eers daarby uitkom.
Ons vertrek vroegdag uit Johannesburg. Met net ’n raps meer as 250km se ry kan ’n mens maklik eers die Saterdagoggend die pad vat én nog genoeg daglig hê vir die eerste skof. My ánder broer, Marcus, sy vrou, Nenine, en hulle agtjarige dogter, Mischa, het ook eers met hanekraai van Mbombela (Nelspruit) gery, en ons ontmoet mekaar op Suikerboschfontein by die Oom Japie-hut. Dis uiteindelik tyd om te sien waaroor Deon al die jare so ’n bohaai maak.
DAG 1 10 KM Oom Japie na Rooikrans
Dit is Marcus, Nenine en Mischa se eerste naweekroete, en ons durf dit soos properse pakesels aan met al ons kos en klere op die rug. Vandag gaan ons klim, klouter en kreun!
Teen 1820m bo seespieël is die vertrekpunt hier by die hut die hoogste punt op die roete waarvandaan dit vir byna ’n uur geleidelik deur
