My man, Hancu Louw, spot gereeld dat ek nie ’n roete op my staplysie afmerk totdat hy dit nie saam met my gestap het nie. Die afgelope Nuwejaar gaan wys ek vir hom die poort. Ons vriende Tanya Erasmus, Maude Sandham en Daniel Buckland gaan saam.
Dis eintlik vreemd dat Hancu nog nooit hier was nie, want hy is in ’n voetslaan-familie gebore. My skoonma, Louise, onthou nog goed hoe sy as kind dié roete in die winter saam met haar ouers kom stap het: “Soggens rol die wasem uit jou mond, só koud is dit. Maar die handskoene en ekstra lae klere het gou gewaai sodra die son uit was. My ma het elke oggend met ’n long johns onder haar broek begin stap, en dan was dit ’n vreeslike gedoente om die ding weer uit te trek!”
Die langwerpige Blyderivierspoort-natuurreservaat (sowat 22500ha) strek van net buite Graskop vir sowat 50km noord saam met die gelyknamige canyon tot ánderkant die Blyderivierspoortdam. Die driedagstaproete lei ’n mens deur die suide van die poort.
DAG 1 3,5 KM God’s Window na Watervalspruit
Die stapgroep ontmoet mekaar by die Bourke’s Luck-kolkgate. Hier’s plek onderdak waar die motors die volgende paar dae veilig agter ’n hek kan staan. ’n Bussie neem ons en ons dagsakke na die beginpunt langs die R534-luspad, ’n entjie verby die God’s Window-uitkykpunt. Dis ietwat van ’n teleurstelling – hier’s nie eens ’n bordjie wat die
