Ons het onlangs in die Kgalagadi-oorgrenspark by Twee Rivieren, Nossob en Mata Mata gekamp. Hier was ons bevoorreg om twee besonderse mense te ontmoet en ook meer te leer oor Sanparke se ereveldwagters.
Danie en Humilta Koch is van Langebaan en hulle harte lê in die Kgalagadi: “Die rooi sand is my hartplek,” sê Danie. Danie-hulle het onder meer met ’n verstopte toilet by ’n piekniekplek gehelp én ’n motoris wat batteryprobleme gehad het. Hulle het ook vir opwinding gesorg met die vang van ’n geelslang in die kampplek van Nossob waar hulle naby ons gekamp het.
Die ereveldwagters is natuurliefhebbers wat opgelei word vir geldinsameling, inligtingsessies, die verskaffing van middele en dienslewering om só die natuurlike erfenis van ons nasionale parke behoue te laat bly vir die nageslag. Ook die helikopters wat wildstropery beperk, die brandblussers op die wildbewaarders se bakkies en die onderhoud by voëlkykskuilings is maar enkele van hierde goeie mense se bydraes.