VOORAF
Ek en my We-e-e-...
Hierdie is sekerlik ’n eerste vir Weg? Ek was ’n tyd lank ’n gids vir die Kanadese toermaatskappy G-Adventures en het gereeld weke lank tussen Kaapstad en die dorp Livingstone in Zambië getoer. In 2010 het my broer, Mouton, vir ’n paar weke saam gereis.
By die Victoria-waterval het ons ’n Weg-tydskrif op sy rug vasgemaak voordat ons die 111 m-reksprong van die brug af aangepak het!
RUDOLF BADENHORST, Lilongwe
Dit wil gedoen wees, dankie, Rudolf. Ons vermoed dis die eerste keer in menseheugenis dat ’n tydskrif ’n reksprong doen. – Red.
Só moet jou dag begin
Die klok het skaars 8 vm. geslaan toe verskyn twee reënboë oor die T’Niqua Stable Inn ( tniqua.co.za) op Plettenbergbaai.
Dit het heelnag gereën en dié oggend was prentjiemooi.
Jy vergeet heeltemal van die stad se lawaai sodra jy jou tasse hier uitgepak en die fynbos geruik het. Later die middag het ons tot by die kranse gestap en nóg ’n mooi uitsig geniet.
CLARINDA SCHOEMAN, Pretoria
Op en Wakkerstroom
Ek het die artikel oor Wakkerstroom in Weg #177 baie geniet – ons gesin kuier
