BRIEWE
’n Veld vol vrolik
Ek het dié blomfoto op ’n besoek aan die Nieuwoudtville-omgewing in Augustus 2018 geneem – dit was ’n besonderse oes daardie jaar!
Plate gousblomme en waterkatsterte (inlas) het gepronk op pad na die Grasberg-gasteplaas sowat 12 km noord van Nieuwoudtville. Vanjaar lyk dinge belowend en ek is van plan om beslis weer die Nieuwoudtville-omgewing te besoek. Selfs sonder blomme is dit lekker – en mooi op ’n anderse manier.
RIAAN WOLHUTER, Stellenbosch
Spieëltjie, spieëltjie aan die wand
Ek en my man, Robin, het in Julie vanjaar by die Tuinroetedam naby George gaan stap. ’n Effense bries het oor die water getrek, maar die wind het mettertyd gaan lê. Die Outeniekwaberg en wolke het só mooi in die water weerkaats ek móés eenvoudig ’n foto neem.
PETRA MEESKE, George
