Dit is ’n lus om te luister na die 85-jarige mnr. Mike Krafft (foto onder) oor Namibië se pioniersjare. Op sy rype ouderdom boer hy nog saam met sy seun, René, met beeste en wild by Dordabis, padlangs sowat 90 km suidoos van Windhoek.
Sy oupa, mnr. August Stauch, het Namibië se diamantbedryf een maanligaand in 1908 op dreef gekry nadat hy uitgepluis het hoe die blink klippies juis dáár beland het. Mike woon nou nog op die plaas Ibenstein waar hy op 5 Februarie 1937 gebore is nadat August (sy oupa aan sy ma se kant) dit omstreeks 1920 gekoop het.
Stauch was toe ’n direkteur van Consolidated Mines wat beheer van die diamantbedryf geneem het. Hy was tot 1926 ’n direkteur, “het baie geld gemaak” en kon Ibenstein koop.
Oupa Stauch was die tweede oudste kind van sy boeregesin in Duitsland. Die oudste het die boerdery geërf, en Stauch as tweede seun het by die spoorweë gewerk.
Stauch se oupa kom van Rusland waar sy voorsate hulle in 1642 as boere gevestig het. In 1918 het hulle weens onderdrukking deur die Lenin-bewind na Estland gevlug. Stauch was 16 toe die gesin na Duitsland verhuis het.
Toe Stauch aan asma begin ly, is hy na Namibië met sy droë klimaat verplaas. Hy was gestasioneer op Kolmanskop in die Namibwoestyn, 10 km
