GESOEK: ’N SLIM KROK OP VRYE VOET
DIT moes soos ’n toneel uit ’n monsterfliek gelyk het.
Of die krokodille op ’n teelplaas op die plaas Jan Hoppie naby Bonnievale besef het hulle word aangehou om vir hul vel en vleis geslag te word, weet ’n mens nou nie. Maar op ’n onlangse Dinsdagnag het ’n paar dosyn van dié oerreptiele besluit hulle vang koers en maak dat hulle wegkom…
’n Magdom van die gediertes het uit aanhouding ontsnap en in die rigting van die Breërivier, sowat 300 m daarvandaan, geskarrel. Toe die plaas se eienaar die volgende oggend ligdag besef sy krokspul is nie meer almal op hok nie, moes al wat leef en beef, inspring om te keer dat hulle in die rivier beland, stroomop
