‘Daar ís goeie polisielede’ ‘Ons stem saam dat ons harder moet werk om hierdie aanvalle te voorkom,’ sê polisie-‘sheriff’
Daar is ’n ou waarheid in Suid-Afrika, dis township-gospel: Al manier om die regering se aandag te kry, is om iets aan die brand te steek – die rookseine te laat opgaan.
Dan eers gee die politici aandag.
Dan eers skryf die president ’n ope brief.
“Nee, nee, nee, nee, nee,” smeul min. Bheki Cele se lont kwartpad in ons Zoom-onderhoud.
“Dis die verkeerde ding om te sê! Ons is ’n grondwetlike demokrasie, alle Suid-Afrikaners het die reg om te betoog, maar jy kan nie eiendom vernietig of mense seermaak nie. Jy noem townships – as jy kla oor daar nie water is nie, hoekom brand jy skole af?”
Hoekom ruk boere op Senekal toe, minister? Wetsgehoorsame boere wat voel hulle het elke wettige roete reeds uitgeput?
Nou maar hoe kan hulle só voel, vra die minister ergerlik. Daar is tog wettige roetes.
“Die verdagtes is in die kortste moontlike tyd aangekeer. Hoekom brand jy dieselfde polisiewa wat die verdagtes selle toe gery het? Die hofgebou waarin hulle aangekla word? Hoekom neem jy die reg, wat reeds werk, in eie hande?”
Sy gesig onder sy swart hoed met die rooi veertjie is uitdrukkingloos.
