Van wes na oos deur die hartland
D ie behoefte om te reis en om nuwe landskappe te ontdek en ander mense te leer ken word nie deur ’n pandemie of ’n grendeltyd geblus nie. Inteendeel. Daardie drang om anderkant jou vier mure en lappie grond te verken raak net sterker.
Maar wat maak ’n mens as daardie oorsese vakansie waarvoor jy so lank gespaar het, vir wie weet hoe lank uitgestel word terwyl Alfa, Beta en Delta hulleself uitwoed? Jy ontdek jou eie plek! Honderde Suid-Afrikaners het die afgelope jaar op epiese reise hulle land van nuuts af ontdek.
Elke reis het ’n beginpunt. Ons s’n is Lambertsbaai. Ons toer saam met Live the Journey en die eienaar, Jurgens Schoeman, het dit in sy kop om water uit die koue Atlantiese Oseaan te skep en dit aan die ánder kant van die land, sowat 2000 km later, by Morganbaai in die Indiese Oseaan te gaan gooi. Tussenin lê agterpaaie, bergpasse en dorpies soos Victoria-Wes, Philippolis en Bethulie wat jou gulhartig ontvang. >
Oos van Wes, tuisland bes
Ek en my vrou, Ronel, ontmoet die res van die toergeselskap by die Bosduifklip Restaurant sowat 4km buite Lambertsbaai vir aandete.
Dié vissersdorpie roem homself op sy ongekunstelde Weskus-karakter, maar dis ’n wêreldklas belewenis om by Kobus en Aletta Engelbrecht aan te sit vir ete waar jy omring is deur enorme rotsformasies. Die plaas Albina waarop Bosduifklip staan, is al vier geslagte lank in Kobus se familie, en hy en Aletta maak al 30 jaar saam kos. Spitgebraaide lam
