Tezoj pri Fojerbaĥo, Principoj de komunismo kaj aliaj verketoj

By Karlo Markso and Frederiko Engelso

La famaj dek unu Tezoj pri Fojerbaĥo revoluciis la filozofion; la Principoj de Komunismo estas la unua konciza formulado de tio, kio kelkajn monatojn poste fariĝis la Manifesto de la Komunista Partio.

• Language: Esperanto
• Publisher: Monda Asembleo Socia
• Release date: May 23, 2020
• ISBN: 9782369602262

Book preview

Karlo Markso: Tezoj pri Fojerbaĥo

Laŭ Karl Marx/Friedrich Engels: Werke, vol. 3, p. 533 sj, (Karl) Dietz Verlag, Berlino (GDR), 1969, en la reta versio de

http://www.mlwerke.de/me/me03_533.htm

Tiu ĉi estas la versio publikigita de Engelso en 1888 kiel anekso al „Ludoviko Fojerbaĥo kaj la fino de la germana filozofio"¹, de la teksto verkita de Markso en 1845.

1.

La ĉefa manko de ĉiu ĝisnuna materiismo − inkluzive de la fojerbaĥa ‒ estas ke la objekto, la realo, senseco, estas prenata nur en la formo de la objekto aŭ de la rigardo; sed ne kiel homa sensa agado, praktiko, ne subjektive. Pro tio okazis ke la aganta flanko, kontraste al la materiismo, estis disvolvita de la idealismo ‒ sed nur abstrakte, ĉar la idealismo kompreneble ne konas la realan, sensan agadon kiel tian. Fojerbaĥo volas sensajn objektojn reale distingatajn disde pensobjektoj; sed li prenas la homan agadon mem ne kiel objektan² agadon. Li konsideras do en la „Esenco de la kristaneco³ nur la teorian konduton kiel la vere homan, dum la praktiko estas prenata kaj fiksita nur en sia malpura-juda aperformo. Li pro tio ne komprenas la signifon de la „revolucia⁴, de la praktike kritika agado.

2.

La demando, ĉu al la homa pensado atribueblas konkreta vero, estas demando ne de teorio, sed praktika demando. En la praktiko la homo devas pruvi la veron, t.e. la realon kaj povon, la ĉi-mondecon de sia pensado. La disputo pri la realeco aŭ nerealeco de la pensado, kiu izoliĝas de la praktiko, estas demando pure skolastika.

3.

La materiisma instruo, ke la homoj estas produktoj de la cirkonstancoj kaj de la edukado, ŝanĝitaj homoj do produktoj de aliaj cirkonstancoj kaj de ŝanĝita edukado, forgesas ke la cirkonstancoj estas ŝanĝataj ĝuste de la homoj kaj ke la edukisto devas mem esti edukata. Ĝi do nepre alvenas al tio, ke ĝi dividas la socion en du partojn, el kiuj unu superas⁵ la socion. (Ekz-e ĉe Robert Owen.)

La kuniĝo de ŝanĝiĝo de la cirkonstancoj kaj de la homa agado racie kompreneblas nur kiel revolucia praktiko⁶.

4.

Fojerbaĥo deiras de la fakto de la religia memfremdiĝo, de la duobligo de la mondo en religian, imagatan kaj en realan mondon. Lia laboro konsistas en tio, dissolvi la religian mondon en ĝian mondan bazon. Li pretervidas ke post plenumado de tiu laboro la ĉefaĵo restas farenda. Nome la fakto ke la monda bazo disiĝas de si mem kaj fiksiĝas kiel memstara regno en la nuboj, klarigeblas ĝuste nur el la memdisŝiriteco kaj el la memkontraŭdirado de tiu monda bazo. Tiu mem estas do unue komprenota en sia kontraŭdiro kaj poste praktike revoluciota per forigo de la kontraŭdiro. Do ekz-e, post kiam la tera familio estas malkovrita kiel la sekreto de la sankta familio, nun la unua estas mem teorie kritikenda kaj praktike revolucienda⁷.

5.

Fojerbaĥo, ne kontenta pri la abstrakta pensado, alvokas la sensan rigardon; sed li prenas la sensecon ne kiel praktikan home sensan agadon.

6.

Fojerbaĥo dissolvas la religian estulon en la homan estulon. Sed la homa estulo ne estas abstraktaĵo ene de la unuopa individuo. En sia realo ĝi estas la tutaĵo de la sociaj kondiĉoj / rilatoj⁸.

Fojerbaĥo, kiu ne reagas al la kritiko de tiu reala estulo, estas do devigata:

1-e abstrakti de la historia procezo kaj fiksi la religian menson por si kaj antaŭkondiĉi iun abstrakte ‒ izolite ‒  homan individuon;

2-e ĉe li la homa estulo kompreneblas do nur kiel „specio", kiel interna, muta ĝeneralaĵo kiu ligas la multajn individuojn nur nature.

7.

Fojerbaĥo pro tio ne vidas, ke la „religia menso" estas mem socia produkto kaj ke la abstrakta individuo, kiun li analizas, apartenas en realo al certa sociformo.

8.

La socia vivo estas esence praktika. Ĉiuj misteroj kiuj delogas la teorion al mistikismo, trovas sian racian solvon en la homa praktiko kaj en la kompreno de tiu praktiko.

9.

La plej alta atingo de la rigardanta materiismo, t.e. de la materiismo kiu komprenas la sensecon ne kiel praktikan agadon, estas nur la rigardo de la unuopaj individuoj en la „burĝa socio".

10.

La starpunkto de la malnova materiismo estas la „burĝa" socio; la starpunkto de la nova la homa socio, aŭ la sociiĝinta homaro⁹.

11.

La filozofoj nur diverse interpretis la mondon; sed necesas ĝin ŝanĝi.

Karlo Markso: La politika indiferentismo

Laŭ: Karl Marx/Friedrich Engels: Werke [MEW]. (Karl) Dietz Verlag, Berlin. Volumo 18, 5. Eldono 1973, senŝanĝa represo de la 1-a eldono 1962, Berlino/GDR, p. 299-204, laŭ la reta versio en:

http://www.mlwerke.de/me/me18/me18_299.htm

Verkita fine de 1872 - komence de januaro 1873.

Laŭ: „Almanacco Rebubblicano per l'anno 1874".

El la itala.

„La laborista klaso ne rajtas konsistigi sin kiel politikan partion, ĝi rajtas neniapretekste entrepreni politikan agon, ĉar la batalo kontraŭ la ŝtato estas la agnosko de la ŝtato, kaj tio kontraŭdiras la eternajn principojn! La laboristoj ne rajtas fari strikon, ĉar malŝpari fortojn por atingi altigon de la salajro aŭ malhelpi ties malaltigon, signifas agnoski la sistemon de dunglaboro, kaj tio kontraŭdiras la eternajn principojn de la liberigo de la laborista klaso!

Se la laboristoj unuiĝas en sia politika batalo kontraŭ la burĝa ŝtato, nur por atingi koncedojn, tiam ili faras kompromisojn, kaj tio kontraŭdiras la eternajn principojn! Oni devas do kondamni ĉian pacan moviĝon kian la anglaj kaj usonaj laboristoj entreprenas pro malbona kutimo. La laboristoj ne malŝparu siajn fortojn por atingi leĝan limon de la labortago, ĉar tio signifas fari kompromisojn kun la entreprenistoj, kiuj tiam povus ekspluati la laboristojn jam nur 10 aŭ 12 horojn anstataŭ 14 aŭ 16. Same ili ne klopodu atingi leĝan malpermeson de fabriklaboro de knabinoj malpli ol dekjaraj, ĉar per tiu rimedo ankoraŭ ne estas forigita la ekspluatado de subdekjaraj knaboj; ili konsentas per tio novan kompromison, kaj tio makulas la purecon de la eternaj principoj!

Eĉ malpli la laboristoj postulu, ke, kiel okazas en la usona respubliko, la ŝtato, kies buĝeto estas starigita sur kostoj de la laborista klaso, estu devigata doni al la infanoj de la laboristoj bazan instruadon, ĉar la baza instruado ankoraŭ ne estas universitata instruado. Estas pli bone se la gelaboristoj ne povu legi nek skribi, ne kalkuli, ol ke ili ricevu la instruadon de instruisto en ŝtata lernejo. Estas signife pli bone se nescio kaj ĉiutaga laboro de 16 horoj stuporu, ol ke rompiĝu la eternaj principoj!

Se la politika batalo de la laborista klaso alprenas perfortajn formojn, se la laboristoj metas anstataŭ la diktatoreco de la burĝaro sian revolucian diktatorecon, tiam ili faras la teruran krimon de principrompo, ĉar ili, pro kontentigo de siaj mizeraj profanaj ĉiutagaj bezonoj, pro rompo de la rezistado de la burĝaro, donas al la ŝtato revolucian kaj provizoran formon, anstataŭ demeti la armilojn kaj forigi la ŝtaton. La laboristoj ne rajtas formi unuopajn metiajn sindiatojn por ĉiu profesio, ĉar per tio ili eternigas la socian labordividon, kiu ekzistas en la burĝa socio; tiu