AS EEN van die Dierebeskermingsvereniging (DBV) se senior inspekteurs het Reinet Meyer deur die jare baie dinge aanskou wat ander se maag sal laat draai. Wrede dinge. Eksentrieke dinge. Grillerige dinge.
Maar toe sy vroeër vandeesmaand, op Donderdag 4 April, versigtig in ’n onopvallende huis in ’n netjiese buurt van die Noord-Vrystaatse dorpie Hennenman instap, onseker wat presies op haar wag, het sy voor iets te staan gekom wat sy beskryf as “’n werklike skok”.
By die huis se voordeur was ’n kennisgewing aangebring met die woorde: “God is liefde”. Maar die realiteit binne dié huis was iets wat baie meer klink na ’n beskrywing van die verderf.
Die huis waarna sy ontbied is, was van buite skaflik genoeg. Nie spoggerig nie, maar ook nie bouvallig nie. Daar was ’n ysterkrokodil teen die sekuriteitshek en ’n paar blomme van metaal teen die muur om dinge op te vrolik.
Maar toe die deur oopkraak, was die eerste ding wat haar en diegene saam met haar opgeval het, die onheilspellende duisternis. Rakke en gordyne is voor vensters aangebring