‘AS IEMAND MET MY KOM MOEILIKHEID SOEK, GAANHULLE TWEEDE KOM. EK GEE NIE OM WIE JY IS, HOEVEEL JULLE IS NIE. JY GAAN TWEEDE KOM’
DIE oprit van sy huis in Pretoria kon netsowel iets uit ’n toneel in ’n advertensie vir ’n Italiaanse modehuis gewees het. Dís hoe hy daar staan: Stoppelbaard. Rooi Gucci-sweetpak. Rooi Adidas-tekkies. Rolex styf aan sy arm.
En moenie eens vra of hy al dié blink dinge iewers op die onderste verdieping van ’n goedkoop plaaslike inkopiesentrum uitgesnuffel het nie. Álles wat Peet Viljoen dra en besit, is real.
Hy haat fakes, sê Peet. Dit geld vir handelsname en mense. Maar veral handelsname.
“As jy nie ’n Rolex kan bekostig nie, dan dra jy nie ’n horlosie nie.”
Hier binne die hoë grensmure van die Woodhill-landgoed in Pretoria se ooste – hier waar die mense weet van blink – is waar Peet en Mel Viljoen hul lewe saam gebou het en saans hul hoofde rustig op hul kussings neerlê.
Rustig, so hou hulle vol, ondanks die stories oor regseise wat na hulle geslinger word – dís nou as jy luister na berigte oor die grootbaas van die internasionale Tammy Taylor-naelryk wat die twee glo hof toe wil sleep vir miljoene dollars.
Rustig, want, as ’n mens Peet glo, ken hy nie vrees nie. Hy is komkommerkoel.
“As iemand met my kom moeilikheid soek, gaan hulle tweede kom,” sê hy op ’n kol terwyl vandag by hom en sy bekende vrou kuier. “Ek gee nie om wie jy is, hoeveel julle is nie. Jy gaan tweede kom; dis net hoe dit is. Wen is al wat ek ken.”
