REEDS toe die eerste episodes uitgesaai is, het ’n mens gesien hier gaan die hare vlieg. Wanneer van die vroue aanbied om mekaar se botoksinspuitings te betaal, of kla dat ander te veel oor naels praat, voel jy deurgaans daar gaan enige oomblik ’n katgeveg losbars.
Maar min mense sou kon voorspel die grootste drama in Die Real Housewives van Pretoria gaan losbars nie net om die kop van een van die vroue nie, maar om ’n Housewife én haar man.
Peet Viljoen, die eggenoot van die Housewife Melany, oftewel Mel, staan beskuldig van meer misdrywe as wat party van die vroue skoene in hul instapklerekaste het. Van dié beskuldigings het al in die hof gaan draai, en die nasionale vervolgingsgesag sê die vervolging gaan voort.
Dan is daar die bewering dat hy ’n buffelagtige baas is wat al een van sy werknemers vir ’n “f***** bitch” uitgeskel het. Selfs mense wat nie die reeks kyk nie, sou teen dié tyd al in die nuus kon aflei dat Peet en Mel in die spervuur is oor hul sakeonderneming, Tammy Taylor Nails South Africa.
Onlangs is in die M-Net-program beweer die twee het nie meer ’n lisensie om sake te doen onder die naam van Tammy Taylor (’n sakevrou van Amerika) nie, maar dat hulle desondanks daarmee voortgaan. Boonop word beweer die akrielpoeiers en -mengsels wat hulle gebruik, is nie die “regte” Tammy Taylor-formule nie en