ONS SPAARGELD VIR ’N RYK TINDER-BOEF
DIE foto’s was die lokaas. ’n Aantreklike donkerkopman in ontwerpersklere poseer op al wat ’n eksotiese bestemming is – hier op ’n seiljag, daar voor ’n deftige motor. Simon Leviev se profiel op die aanlyn afspraakdiens Tinder het dit uitbasuin: Ek is skatryk.
Die vroue wat met hom op afsprake gegaan het, kon dit ook eerstehands beleef, met drankies by vyfsterhotelle en uitstappies in ’n privaat straler. Hoe dan anders as jy tyd deurbring saam met die erfgenaam van ’n Russies-Israeliese diamantryk?
Voeg daarby sy humorsin en ’n byna magnetiese aantrekkingskrag, en kort voor lank was meer as een vrou so verlief op Simon – en so oortuig van sy liefde – dat hulle byna enigiets vir hom sou doen.
