VEEDIEWE is nie die enigste misdadigers wat boere jaarliks duisende rande aan verlore ure en inkomste kos nie. Onwettige jag met honde het die afgelope jare ontaard in ’n hoogs georganiseerde “sport” waar jagters tienduisende rande aan honde bestee en weddenskappe en prysgeld honderde duisende rande per jagtog kan beloop.
Boonop is dit selfs moeiliker om sulke jagters aan die pen te laat ry as veediewe omdat die strafregstelsel as ’t ware blind is vir die misdaad.
Jakkals le Roux, voorsitter van Vrystaat Landbou se veiligheidskomiteee en veeboer by Wesselsbron, wys op talle haakplekke in die stryd teen dié misdaad. “As jy die jagters vang, op kameras of binne padreserwes, is die eerste probleem dat jy nie weet waar hulle gejag het nie, en sonder ’n klaer (in ’n strafsaak) kan jy niks doen nie.
“Tweedens, noudat jy hulle gevang het, moet jy die polisie bel. Al het jy ’n goeie verhouding met die stasiebevelvoerder, het jy dalk nie dieselfde verhouding met die konstabel wat uitkom nie. Jy moet twee of drie uur vir die polisie wag, en dalk is daardie konstabel vriende met die jagters en laat hulle dadelik vry.
“Daardie jagters weet boere kan