IN SY alledaagse werk het hy baie vyande gemaak – mense met baie om weg te steek.
En hy het geweet hulle sou nie huiwer om hom groot leed aan te doen nie.
Daarom het Cloete Murray (57) moeite gedoen om sy persoonlike lewe uit die kollig te hou. Hy het hom skaars gehou op sosiale media en sy geliefdes probeer beskerm.
“Cloete het soms gesê hy weet hy trek die leeu se snorbaarde,” vertel een van sy vertrouelinge vandag.
Nogtans het hy voortgegaan met sy werk as insolvensiepraktisyn, waarin die papierspoor van korrupsie en bedrog dikwels blootgelê word.
Hy was betrokke by die likwidasie van die omstrede Bosasa-dienstegroep, wie se beweerde bande met die Gupta-familie en staatskaping deur die Zondo-kommissie van ondersoek oopgevlek is. Ook by ander sensitiewe sake waaroor hy nie sommer met Jan Alleman sou kon praat nie.
In sulke sake trek jy groot leeus se snorbaarde.
