Fyn bestuur, area plaas tafeldruiwe op wenpad
Kies jy die kronkelpad tussen Scherpenheuwel en Robertson, wag ’n ongewone uitsig op jou wanneer jy oor die kop kom. In die dorre, semi-Karoo-agtige landskap is honderde hektaar tafeldruifblokke en sitrusboorde – alles onder net – tussen die rooi koppe gevestig. Die hartklop van dit alles is ’n moderne kantoor-en-pakskuurkompleks.
Dit is hier, op die plase Le Chasseur en Gorreeshoogte, waar mnr. Jan en me. Christie Rabie skouer aan die wiel sit om die bekende Oos-Kaapse sitrusboerdery Habata se Wes-Kaapse belange te vestig. Christie is mnr. Hannes en me. Marié Joubert van Habata se dogter.
“Ons het dikwels op direksievergaderings gepraat oor die Wes-Kaap as ’n geleentheid om Habata se risiko te versprei, want in daardie stadium was dit net sitrusboerdery in die Sondagsriviervallei. Alles was dus in een mandjie. Die groot kwessie was die geleentheid om die Amerikaanse mark, met sy 300 miljoen mense, van sitrus te kan voorsien, want die Oos-Kaap is (weens swartvlek) nie aan dié mark blootgestel nie,” vertel Jan. Hy het op Nuy grootgeword en sien ook om na sy familieboerdery op die plaas Leipzig, met sy ma, Amanda, en suster,
