Kontantvloei is koning in die groentesaadbedryf, en danksy sy presiese, ondersoekende ingesteldheid kon die ingenieur Johan Strasheim (66) die bedryf as groentjie aanpak en regdeur die droogte-insinking tot ’n top-uitvoerboer vorder.
Vir byna 44 jaar was somme en beplanning dié bedryfsingenieur en oudprofessor se kos, en die bou van komplekse stelsels sy asem. Dit is juis dié kernvaardighede van ingenieurswese wat Johan, wat lank aan die Universiteit van Pretoria verbonde was, in staat gestel het om ’n plaas op ’n stuk ongerepte aarde te omskep in ’n vooraanstaande groentesaadboerdery.
Elf jaar gelede het hy en sy vrou, Romana, besluit dit is tyd vir ’n nuwe hoofstuk toe hul kinders uit die huis is. Johan wou sy eie wildplaas begin en het aanvanklik ’n klein besproeiingsplaas by Lategansvlei, tussen Oudtshoorn en Calitzdorp in die Wes-Kaap, gekoop. Hy het dit van 2012 tot 2015 ontwikkel en dit is later verkoop aan Starke Ayres, wat dit vandag as navorsingsplaas bedryf.
“Eers nadat ons van Pretoria getrek het, het ek gehoor van die kweek van groentesaad en die wêreldwye uitvoermoontlikhede.”
Die presisie, tegniek en vaardighede daaragter het die ingenieur in hom geprikkel, en hy het soveel moontlik daaroor nagevors en groentesaadboere in die omgewing geraadpleeg.
Vier jaar later het Johan die idee van die wildplaas laat vaar en ’n ander