Groen katoen floreer met min voedingstowwe en is ’n yster as wisselbougewas, meen mnr. Richard Godfree-Thom, een van ’n hand vol katoenboere in die Vaalharts-skema buite Hartswater in die Noord-Kaap.
Besparings van tot R3 000/ha is moontlik as jy oordeelkundig bemes, sê hy.
Dié jong derdegeslagboer het ná skool vir ’n stroopkontrakteur in Texas, Amerika, gewerk. Tuis is hy aan die diep kant ingegooi toe hy ná sy eerste jaar sy landboustudie moes laat vaar nadat melanoom- en longkanker by sy pa, Stuart, gediagnoseer is. Sy pa is kort daarna oorlede.
Boer is in sy bloed. “Ek kan nie onthou dat ek ooit huiswerk gedoen het nie. Direk ná skool het ek na ons landerye gehardloop om op ’n trekker te klim.”
Só het hy baie lesse by sy oorlede pa en uit eie ondervinding geleer. “Die grootste daarvan is om die waarheid deur ’n ophef of bohaai te sien deurskyn, soos hoeveel misstof werklik toegedien moet word vir winsgewende oeste.
“Waar ons bewaringsboerdery en wisselbou toepas, het ons die voedingstofstatus met dieselfde insette verhoog. Elke jaar se bemestingsproewe toon dat ons hoër bemestingspeile dieselfde opbrengs as ons lae bemestingspeile lewer. Eersgenoemde verlaag jou winsgewendheid.”
’n Mens moet ook nie by slegte ervarings vashaak nie. Leer eerder daaruit en kyk holisties na ’n situasie. “As jy jou motor stamp, is dit nie die einde van die wêreld nie. Jy kan dit regmaak.”
Alles wat Godfree-Thom aanpak, wentel om die boerdery se finansiële behoud.
“As jong boer wil jy mos dinge
