Voor 19 Februarie was Joshlin Smith ‘n kind bekend aan net die mense rondom haar, maar sedert haar verdwyning op dié dag en haar foto soos ‘n veldbrand op sosiale en ander media versprei het, het sy ons almal se kind geword. Wat met haar gebeur het, is té bisar en té hartseer om te ignoreer, en dwing ons om opnuut na mensehandel en die impak van sosiale verval in ons gemeenskappe te kyk.
Navorsing wys armoede is een van die grootste dryfvere vir mensehandel (human trafficking).
Die nuus dat Joshlin se ma, Raquel “Kelly” Smith (33), ‘n selferkende tikgebruiker, haar na bewering vir R20 000 verkoop het, het skokgolwe deur die land gestuur en Saldanha-inwoners woedend gelaat.
Kelly is saam met haar kêrel, Jacquen “Boeta” Appollis (31), ‘n vriend, Steveno van Rhyn (27), en Phumza Sigaqa aangekla van ontvoering en mensehandel, berig Netwerk24. Die klagtes teen Phumza is intussen teruggetrek weens ‘n gebrek aan bewyse. Teen druktyd was Joshlin steeds vermis.
