WEG IN’N OOGWINK
Dis sekerlik enige ouer se grootste nagmerrie: Terwyl jou aandag vir ’n oomblik afgetrek is, slaan gewetenlose misdadigers toe en gryp jou kind.
Vrese oor kinderontvoering en daarmee saam mensehandel het die laaste ruk amper in paniek ontaard nadat ’n man helder oordag probeer het om ’n kind van ’n restaurantstoep in Florida, Johannesburg, te ontvoer.
Op ’n video van die voorval kan gesien word hoe die verdagte oor die reling spring en die kind probeer gryp. Danksy ’n restauranteienaar met opleiding in Oosterse gevegskuns, is ’n tragedie in hierdie geval afgeweer.
Nie lank daarna nie het ’n egpaar van Germiston tot hul afgryse besef dat ’n man by ’n kruising besig was om hul kind deur die motor se oop venster na buite te probeer trek. Terwyl die vrou desperaat aan haar kind se bene geklou het, het haar man weggejaag en sodoende die verdagte afgeskud.
Sedertdien is verskeie voorvalle van pogings tot kinderontvoering aan die groot klok gehang. WhatsApp-groepe het gegons met waarskuwings dat vroue besig is om foto’s van kinders by skole of in winkelsentrums te neem of kinders deur verdagtes agtervolg word.
Dat ’n onderwyseres pas tot effektief 10 jaar tronkstraf gevonnis is nadat sy verlede jaar ’n sesjarige van Vanderbijlpark ontvoer het, het vrese verder aangewakker dat kinderontvoering en mensehandel aan die toeneem is. Die meisie was vir 19 uur vermis voordat sy langs die pad afgelaai is.
Tharina Human, die meesterbrein agter die misdaad, was met die
