MATCH-BOX op matchbox hierso op die kaal Cape Flats-sand, hierso waar die South Easter op sy worst waai … Here, where flowers an’ grass jus’ don’t grow.
Dis asof Adam Small hier op Middelpos, Saldanha, gestaan het toe Joshlin een middag verbyhardloop. Haar ligte hare is in ’n vlegsel vasgemaak en haar groenblou oë glinster in die son. Sy hou van vlegsels.
Sy’s op pad skool toe. En vanmiddag gaan sy saam met die buurt se kinders kom speel.
Soms kry sy ’n geldjie, dan gaan sy gou huiskafee toe vir lekkergoed. Vir ’n rand kan sy darem ietsie kleins kry om te kou.
Haar grootste plesier is om in die middag by ’n tannie te gaan kuier wat sy al van kleintyd af ken. Daar kyk sy tekenprente op die televisie. Voor die “poppetjies” sit sy vasgenael.
Dié vrou maak haar huis al jare vir Joshlin oop. Hier speel en eet sy heerlik. Sy noem die tannie sommer “Mamma”.
“Joshlin is ’n lieflike kind,” vertel een van die mense wat haar gereeld hier sien speel. “Sy het sulke mooi maniere. En sy hou van speel. Sy is te pragtig, met die mooiste ogies en die mooiste glimlag. Sy is lief vir haar lekkertjies. Sy is veral lief vir TV kyk.”
En wanneer die son sak, is sy terug: ’n sinkplaathut ’n paar kilometer weg.