DIE vlamme in die gasverwarmer dans soos ’n regte kaggelvuur in die egpaar se sitkamer. Genoeg om dit warm en knus te maak, ondanks die mistige Kaapse koue buite.
Carol van der Linde vertel dis haar en Toks se droomhuis terwyl sy koffie aangee as ekstra troos teen die koue.
“Dit is vir my die grootste bederf in die lewe wanneer iemand vir my koffie maak. ’n Ekstrawarm koffie. Toks bring dit vir my in die oggend. Hy ken my goed,” vertel sy.
“Hy het ook nou die dag vir my daardie groot bos blomme gekoop om my beter te laat voel,” sê sy en wys na ’n pragtige ruiker wat op die kombuistafel staan.
