DAAR’S geen ander manier om dit te sê nie: Sy smeul voor die kamera.
Haar bruin oë skitter, haar goudbruin lokke val in golwe oor haar skouers, en sy is die ene selfvertroue in haar rooi satynbloes, stywe swart broek en stiletto’s.
So goed lyk Amor Vittone (51) dat dit moeilik is om te glo sy is die afgelope tyd deur diep waters.
Maar sy is. Stormwaters, eintlik.
En dis nou eers dat sy weer ’n stiller hawe kon bereik; nou eers dat die golwe om haar weer begin bedaar.
Haar moeilike hoofstuk het begin toe sy sowat ’n jaar gelede die een slapelose nag ná die ander gehad het.
“Stres en trauma het my geteister,” vertel die sangeres en aktrise vandag. “Ek het nagte in my bed gelê en my brein wou nie afskakel nie. Gedagtes van twyfel en stemme in my kop het leuens vertel wat sê ek is nie goed genoeg nie.”
Sy het slaappille gebruik, erken sy – en teen hierdie tyd verlede jaar was sy afhanklik daarvan.
Sy het weens haar malende, angstige gedagtes en middelmisbruik ’n ineenstorting beleef en in die waakeenheid van ’n hospitaal beland, vertel sy, en moes ’n psigiater sien om haar onderliggende seer