Ek staan op die Zimbabwiese kant van die Batoka-ravyn en die krag van die water wat teen die krans aftuimel, is verstommend. Die sproeireën gooi ons sopnat en ’n reënboog belig die mis. Dit maak nie saak hoeveel keer jy dit al gesien het nie, die Victoriawaterval is asembenemend.
Ek is deel van ’n groep joernaliste uit Kaapstad en Johannesburg en ons is hier om te sien hoe die gemeenskap van Vic Falls die Covid-19-storm oorleef het.
Aan die oorkant van die 60m wye kloof – aan die Zambiese kant – is Livingstoneeiland. In November 1855 was die sendeling-verkenner David Livingstone die eerste Europeër wat dié verskynsel gade geslaan het. Toe sy verkenningsgroep op die Zambesirivier geroei het, kon hulle die kolomme watersproei reeds van myle ver af gesien het. Livingstone het glo uit sy kano geklim en na die rand van die ravyn gekruip. Die fyn sproei het hom aan “iets soos sneeu” herinner.
’n Standbeeld van Livingstone kyk uit oor die westelike deel van die ravyn. “The most wonderful sight I had seen in Africa,” het hy glo gesê. Tinashe Sithole,