Dit is belaglik, dink ek terwyl ek jalapeños in ‘n gesteriliseerde fles stop. Dit is middernag. Ek moet vieruur op wees om by die lughawe uit te kom en hier staan ek en probeer iets van die hoop vars produkte – rissies, groenbone en grenadellas – wat ons tuin skielik gelewer het te maak. Ons sou vir drie weke weg wees, so dit moes nóú gebeur, anders het ons verniet ure met ons plantjies gesels om goeie groei te verseker.
Dit is hoe dit begin het. Die groter prentjie is dat ek en my vrou, Kapenaars, ‘n lank uitgestelde reis geskeduleer het wat ‘n paar dae in Gauteng sou insluit voordat ons sou koers kies na die Nasionale Krugerwildtuin. Dit sou ‘n ware mengelmoes van ervarings wees,
