VAN SEER OOG TOT ’N LUS VIR DIE OOG
JY KAN kerm en kla oor die verval, of jy kan jou moue oprol en self iets aan die saak doen. Soos die gewone mense van Kroonstad, wat dié Vrystaatse juweel met hul regrukveldtog weer gepas vir sy naam laat skitter.
Die provinsie se derde grootste stad – die geboorteplek van bekendes soos Antjie Krog, Max du Preez, Mosiuoa Lekota en Robbie Wessels – was nog altyd bekend as ’n belangrike landbou- en spoorvervoersentrum, byna halfpad tussen Johannesburg en Bloemfontein.
Maar in onlangse jare het agteruitgang weens gebrekkige dienslewering in die gedaante van strate vol slaggate en rommelbestrooide sypaadjies ook hier die glans laat verdof.
