Nuwejaar

FIKSIE

BENITA sit ingedoke op die vreemde bed. Watter deurmekaar jaar was dit nie. Weens covid het twee tydskr if te wat haar gereeld van ’n inkomste verseker het, eenvoudig gevou. As vryskutskrywer was sy hande-in-die-hare moedeloos. Op die rand van depressie. Iets waaraan sy haar nooit voorheen oorgegee het nie.

Toe besluit sy om eers vakansie te hou. Daarna kan sy hard werk aan nuwe kontakte opbou. Ou werkesel, skielik ledig. Voel nutteloos en gefrustreerd. By dié vakansieoord sal sy eers chill, aan haar tan werk, en met hernude ywer die jaar aanpak.

Vanaand is Oujaarsaand, en sy het nie ’n boyfriend of minnaar of vriende nie. Sy het nêrens om te gaan hang nie. Hoe pateties is dit?

Ruk jou reg, Benita! Om op ’n hoop van selfbejammering te sit, is mos nie jy nie.

Nee, sy sal haar aantrek, met haar motor deur die dorp en kyk of sy ’n restaurant of kroeg sien waar daar jolyt is en sy dalk geselskap kan optel. Darem versigtig. Om alleen hier te sit, gaan net te deprimerend wees.