TOPTEELMATERIAAL KERN VAN DIÉ ANGUS-STOETERY
Om beeste te teel wat geneties so goed moontlik is, moet ’n teler voluit werk om sy kudde gedurig te verbeter. Daarom bekom mnr. Jannie Kotzé van die plaas De Panne, Moorreesburg, jaarliks semen van die beste swart Angus-bulle in Amerika en Kanada om in sy embriospoelings- en kunsmatige-inseminasie- (KI) program te gebruik.
Dié jong Swartlandse boer besit die oudste swart Angus-stoetery in die Wes-Kaap en teel jaarliks van die beste beeste wat die hoogste pryse behaal en eerbewyse inpalm.
“Ek streef daarna om fenotipies uitstekende diere te teel wat ook ’n voortreflike reproduksievermoë met optimale groei het, asook koeie met goeie melkproduksie wat kalwers met ’n puik speengewig lewer.
