Aangepaste Angusse verras in klipharde Karoo
As ’n Angusbees in die Karoo geteel word, sal dit op enige plek in Suider-Afrika aanpas, sê mnr. Carl Möller.
Dié sewendegeslag-Carnarvonboer praat nie groot of skiet spek as hy sê hy het “nog nooit ’n comeback gehad” van die sowat 250 hoogs aangepaste diere wat hy al landwyd en in Namibië verkoop het nie.
As enigste teler in die genadelose Groot-Karoo, waar die natuur jou beste uitdunner is, slaag hy deurentyd daarin om aangepaste, geharde diere te teel.
Möller, van die plaas Gannapan tussen Carnarvon en Van Wyksvlei, se pa en oupa het hoofsaaklik met Dorperskape geboer. Sy pad het met Angusbeeste gekruis toe hy en sy vrou, Saartjie, in die 1990’s ook boerderybelange naby Greyton in die Overberg gehad het. “Ons het sowat 15 jaar lank op Matjesgat by Greyton met appels en wolskape geboer. Daar het
