’N BEES VIR DIE VELD ÉN DIE VOERKRAAL
PLAASINLIGTING
LIGGING: Parys, Vrystaat
NAAM: Goedgedacht
EIENAARSKAP: Familievennootskap
VERTAKKINGS: Stoet- en kommersiële beeste en voerkraal
GRONDTIPE: Rooi- en swartklei
VELDTIPE: Gemengde soet-suurveld
GEMIDDELDE REËNVAL: 700-800 mm per jaar
KORTOM
■ Dié boerdery verkies vrugbare, geharde beeste wat grootliks sonder ’n lek op weiding kan oorleef en reproduseer. Die Droughtmaster slaag dié toets.
■ Deur ’n semi-ekstensiewe beesboerderystelsel met ’n semiintensiewe voerkraal te kombineer, word heelwat van beesboerdery se risiko’s uitgeskakel.
■ Harde werk en goeie bestuur vul die boerdery se suksesverhaal verder aan.
As sesde geslag van die Dannhauser-familie op dieselfde grond by Parys in die Noord-Vrystaat is daar veral drie dinge wat vir mnr. Johan Dannhauser ononderhandelbaar is: harde werk omdat niemand op die rug van die vorige geslag se sukses kan ry nie, die toepassing van voortreflike boerderybeginsels, en geharde, vrugbare beeste wat op die veld én in die voerkraal hul man kan staan.
Die boerdery met die hoofplaas, Goedgedacht, as hoofkwartier, word deur mnr. Kobus en me. Gezina Dannhauser besit en deur hul seun, Johan, bestuur. Die grond is in ’n trust waarvan Johan en sy susters, me. Carina Taljaard en me. Devina Dannhauser, saam met hul ouers die trustees is. Die boerdery huur die grond by die trust. Dus het die boerdery geen ander keuse nie as om winsgewend te boer.
