Name wat sing
Danksy my werk was ek die afgelope paar weke bevoorreg om deur die Langkloof te ry. Daarna ook dele van Mpumalanga en KwaZulu-Natal. Op die paaie was daar Tygerfontein, Olifantskop, Wolweberg en Wolwespruit. By Wolwefontein, anderkant Jansenville, het ek afgedraai om na die plattelandse hotel te gaan kyk. Dit is natuurlik nie die wolf van die Noordelike Halfrond nie, maar ons plaaslike hiënas wat deur die ou boere ’n wolf genoem is.
