Die Ranchero-glyplank
Ek lees ’n ruk terug van ’n Kaapse skoolonderwyser wat een van haar leerlinge geklap het. Tussen die berig self en die leserskommentaar onderaan – ’n kombinasie van mense wat lyfstraf verdedig en aantygings van rassisme – was dit nie aangename leesstof nie, maar dit het my wel laat terugdink aan die kere in my kinderjare dat ek getug is.
My ma sal jou vertel ek is verantwoordelik vir elkeen van haar grys hare, en as jy my pa vra of ek werklik so onhebbelik was, sal hy sy ken tot op sy bors laat sak en met sy wysvinger beduie na die laaste drie haartjies op sy hoof.
Ek het my eerste drag slae gekry toe ek 5 jaar oud was. Ons het in Richardsbaai, KwaZulu-Natal, in die buurt Arboretum gewoon. Ons bure was meestal Engelssprekend, dikwels Skotse ingenieurs wat na Suid-Afrika gekom het om Richardsbaai se hawe te help bou.
