BOEKE EN MUSIEK
ONTMOET DIE SKRYWER
Gerard Scholtz en sy vrou, Anuta, woon op Rooiels, maar het al derduisende kilometer met trapfietse, bromponies en soms te voet afgelê en meer as 70 lande besoek. Gerard is ’n afgetrede dramadosent en werk deesdae as die boekeredakteur by DEKAT. Sy debuutroman, Lig wankelend, is in 2010 gepubliseer. Sy nuwe boek, Hier gaat ons!, is ’n inspirerende reisboek. Gerard vertel meer.
Jy beskryf jouself as ’n toegewyde dokumenteerder. Wanneer het dié passie begin? Sover ek kan onthou, het ek dagboek gehou en briewe geskryf. Wanneer ons reis, skryf ek elke dag omdat beelde oor mekaar skuif en jy nie altyd kan onthou waar jy die vorige dag was nie. En ek is bang iets gaan verlore of dat ek vergeet.
Wanneer het jy en jou vrou besluit om saam te reis? Ons eerste reis saam was in 1972 toe ons as jong mense Champagne Castle (3 377 m) in die Drakensberg uitgeklim het. Dis 47 jaar gelede! Voor ons troue het ons ook op die Kylemeer in Zimbabwe geseil en in Mosambiek gesnorkelduik. Die gogga het toe reeds gebyt.
