Die toneel: Die openingsaand van Aunty Merle: Things Get Real, Marc Lottering se musiekblyspel, in die Baxter-teater in Kaapstad. Die klanktoets is pas afgehandel, die rye stoele wat netnou gepak gaan wees, nog leeg. Op die oomblik is net Jawaahier Petersen op die verhoog. Sy fokus op ’n spesifieke stoel, nommer 8 in ry AA. Madeegha Anders, haar ma, kom saggies nader en vat haar hand. Sê dan vertroostend: “Hy kyk vanaand – en ek is hier.”
Hý, die teaterlegende Taliep Petersen wie se naam met ’n plaatjie op die stoel verewig is. Taliep wat op 16 Desember 2006 in sy huis in Athlone, Kaapstad, op teregstellingswyse doodgeskiet is. Ná die sensasionele hofsaak is Najwa Dirk, sy vrou en Jawaahier se stiefma, 28 jaar tronk toe gestuur vir haar aandeel in die huurmoord. Ou nuus vir almal, behalwe dié naaste aan hom wat steeds elke dag die groot leemte voel.
Vir sy ontredderde kroos was dit asof ’n bom in hul midde ontplof en die stukke van hul lewe oral lê. Jawaahier, die tietie, oudste dogter, moes alles bymekaar probeer hou. Taliep se rekeninge is gevries en daar was verpligtinge, soos skool- en universiteitsgelde. Sy moes dus twee werke met haar voltydse studies balanseer. En het steeds as die beste student in haar groep gegradueer. Harde werk sou ook haar skans wees teen die posttraumatiese