Daar is byna áltyd mense in die Ten Cross Shoppe in Grahamstad (deesdae Makhanda), maar oor die etensuur is die plek stampvol, veral op Vrydae, want dan is dit pannekoekdag.
Die winkel – iets tussen ’n moderne tuisnywerheid, koffiewinkel, teetuin en padstal – fokus elke dag op ’n ander produk vars uit die kombuis: Maandae is dit pasta, Dinsdae jaffels, Woensdae vetkoek en Donderdae quiche.
“Ons het met die pannekoekdag begin en gou agtergekom kliënte hou van roetine – dit het die besigheid geweldig laat groei! Ons het ’n bordjie in die straat uitgesit en begin adverteer, en nou kan ons amper nie byhou nie. Ons bak elke Vrydag 700 pannekoeke,” vertel die eienaar, Chantelle van Eyssen.
Die idee vir die winkel het klein begin. Chantelle het 12 jaar as kantooradministrateur in die departement van ekonomiese wetenskappe by die Rhodes-universiteit gewerk, maar altyd ook gebak wanneer sy ’n kans kry.
“Ek het melkterte op bestelling begin bak, sommer 60 op ’n slag. So twee jaar voor die Covid-19-pandemie het die melktertbesigheid in so ’n mate toegeneem dat ek
