’NGIL klief deur die lug. Zak ruk van die skrik en trek ’n rooi streep oor een van die take wat hy sit en nasien. Wat is dit tog nou weer met Monica in die kamer langsaan? As sy nie douvoordag touspring op die houtvloer nie, kom sy saans watter tyd terug. Hoe sy die pas volhou en elke dag in sy klas oplet, weet hy nie.
Vinnige voetstappe op die houtvloer in die kamer langsaan.
Zak ruk sy deur oop en storm in die gang af. Klop aan Monica se deur, voel aan die knop – dis nie gesluit nie. Versigtig stoot hy die deur oop. Sy staan in die middel van haar slaapkamer en wys na haar bed.
“Wat’s fout?”
Daar is nie ’n inbreker of boef op die bed nie. Dan gewaar hy die spinnekop.
“Ag nee, man.” Hy stap nader, mik na die spinnekop.
