DIT is telkemale beskryf as die “verhoor van die eeu”, met al die elemente van ’n boeiende hofdrama wat niemand ooit kan vergeet nie. Daar was woede en trane, grusame beskrywings en hartverskeurende demonstrasies, en ’n wêreldbekende atleet in die beskuldigdebank. Die tragedie waarom alles gewentel het, was ondenkbaar: ’n pragtige, talentvolle jong vrou doodgeskiet in die fleur van haar lewe.
En dít deur haar eie kêrel in die badkamer van sy huis.
Boonop het hofgangers én kykers van die regstreekse televisieuitsending van die verhoor die verdriet van die beskuldigde en slagoffer se families eerstehands aanskou. En oplaas kom daar toe in Oktober 2014 in die Pretoriase hooggeregshof die vonnis ná sy skuldigbevinding: Die lemnaeler Oscar Pistorius gaan tronk toe omdat hy Reeva Steenkamp in die middernagtelike ure voor Valentynsdag in 2013 doodgeskiet het.
Huisgenoot onthou die grootste oomblikke van die hofsaak wat Oscar se lot geseël het.
SLEUTELGETUIENIS
Die staat het 107 moontlike getuies ingesluit in hul saak teen Oscar en eindelik 20 getuies geroep om in byna 50 hofdae, wat oor sewe maande uitgestrek was, te getuig. Dit was alles om te bepaal wat werklik kort ná drieuur die oggend
