Baie van die kwessies waarmee ek worstel is seker buite jou beheer en dalk meer rede vir gebede, maar dit kan seker nie kwaad doen as ek jou vra nie. Jy het darem meestal drome waar gemaak en wonderwerke gedoen toe ek nog ‘n dogtertjie was. Ek glo nog steeds…
Eerstens, wil ek weet of jy nog altyd daai mollige ou man met die wilde baard is en nog ferm in beheer is van jou produktiewe elwe en superfikse rendiere? Of, is jy ook ‘gekanselleer’ en vervang met ‘n robot met kunsmatige intelligensie wat blitsvinnig pleitbriewe lees en geskenke aanstuur per plaaslike koerier?
