UIT die gang klink ’n geklingel soos Kersklokkies. Dan kom Minke Janse van Rensburg by die sonkamer van haar ouerhuis ingestap met ’n klomp medaljes om haar nek. Aan haar regter-én linkerarm hang nog van hulle. Almal vir swem.
“Sjoe, jy het al baie gewen. Jy is vinnig.”
“Ja, Oom, báie.”
Dié jong swemsensasie is vanjaar as Suid-Afrika se Gestremde Sportvrou van die Jaar aangewys deur die departement van sport, kuns en kultuur.
En dís maar net een van Minke (19) se vele prestasies. Sy is nou die houer van vyf wêreldrekords vir swemmers met gestremdhede. Daarby is sy een van net drie swemmers met downsindroom wêreldwyd wat al as junior swemmer – dit beteken 16 jaar en jonger – ’n ope wêreldrekord teen deelnemers van alle ouderdomme