Een aand oor ’n glas (krat) wyn, vra my vriend Loki: “Wil julle Coldplay in Amsterdam gaan kyk volgende jaar?” “Ja!” stem ons meteens in. (Het ek genoem dat wyn betrokke was?)
Ek het nie vir ’n oomblik gedink dat enige deel van hierdie plan ooit sou realiseer nie; hy kon netsowel gevra het of ons graag op Mars wou gaan ski. Ek het, om die waarheid te sê, van die hele affêre vergeet – die hooi op my vurk kon in daardie stadium ’n melkboerdery aan die gang hou.
“Hoe voel jy vandag?” vra ek ’n jaar later vir Marné (’n godin van ’n mens, ontwerp) in die verbygaan. Die Kaapse winter storm rondom ons. Dis week sewe van twaalf. “Oorleef jy?”
